Turkiyadan qaytganidan so‘ng qamalgan aka-ukalar ozod bo‘ldi

Jinoyat ishlari bo‘yicha Toshkent shahri sudida 15 oktyabr kuni bo‘lib o‘tgan apellyatsiya mahkamasi aka-uka dindorlar – 56 yashar Abrol va 53 yashar Shuhrat Do‘smuhammedovlarni sud zalidan ozod qildi.

8 oktyabr kuni Jinoyat ishlari bo‘yicha Toshkent shahri sudi qamalmasligi haqida prokuror va'dalariga ishonib, O‘zbekistonga qaytgandan so‘ng hibsga olingan aka-uka dindorlar – 56 yashar Abrol va 53 yashar Shuhrat Do‘smuhammedovlarning har birini 6,5 yilga ozodlikdan mahrum etish haqida hukm chiqargan edi.

Sud aka-ukalarni O‘zbekiston Jinoyat kodeksining 244- moddasida (Jamoat xavfsizligi va jamoat tartibiga tahdid soladigan materiallarni tayyorlash yoki tarqatish; diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) va 223-moddasida (qonunga xilof ravishda chet elga chiqish yoki O‘zbekiston Respublikasiga kirish) aybdor deb topgan edi.

Besh yildan buyon qidiruvda bo‘lgan toshkentlik dindor aka-ukalar 28 may kuni Istanbuldan Toshkentga qaytgach, aeroportda qarindoshlariga birrov ko‘rsatilganidan so‘ng qo‘lga olingan edi.

Eltuz.com