Shvetsiyada terrorchilikka aloqadorlikda ayblanayotgan olti o‘zbekning sudi maxfiy zalda boshlandi

Shvetsiyada terrorchilikni moliyalash va teraktlar tayyorlashda gumon qilingan olti nafar o‘zbek ustidan sud 7 yanvar kuni ertalab Ctokgolm okgrug sudining maxfiy zalida boshlandi va o‘zbek tarjimonlari yetib kelmagani bois vaqtincha kechiktirildi.

Soat 11.00 ga yaqin (bitta o‘zbek va ikkita rus tarjimoni yetib kelgach) sud o‘z ishini davom ettirdi. Bundan avval «Eltuz» o‘z manbalariga tayanib mahkamaning Solna tumani sudida o‘tishi haqida xabar bergan edi.

Uch nafar ayblanuvchi – David Idrisson (Farhod Toshmuhammedov), Baxtiyor Umarov, Otabek Abdullaev kishanlangan holda sud zaliga keltirildi.

Bosh prokuror Per Lindkvist (Per Lindqvist) sud ishini ayblov tomoni xulosasini bayon qilishdan boshladi.

Uning bildirishicha, shved maxfiy xizmati SAPO bo‘lajak jiddiy miqyosdagi xavfning oldini olgan. 

«Eltuz» nashri ilgari xabar qilganidek, o‘zbekistonlik Akromjon Ergashev, G‘ulom Tojiev , Farhod Toshmuhammedov, Shoahmad Mahmudov, Baxtiyor Umarov, qirg‘izistonlik Otabek Abdullaevga qarshi Stokgolm sudida «Islomiy davlat» (IShID terror tashkiloti)ni moliyalash va Yevropa davlatlarida keng miqyosda terror aktlariga tayyorgarlik ko‘rish ayblovi ilgari surilmoqda.

Sudlanuvchilarning to‘rt nafari 2018 yilning mayida qo‘lga olinib, ularning biri qo‘yib yuborilgan. 29 dekabr kuni yana uch nafar o‘zbek hibsga olingan edi. Sud 11 fevraliga qadar davom etadi. «Eltuz» nashri jarayonni yoritib boradi.

Eltuz.com