Asosiy mavzular
1 iyul 2019

So‘kong‘ich hokim korruptsiya haqida nimalarni aytdi?

Shu kunlarda Andijon viloyati hokimi Shuhrat Abdurahmonovning respublika darajasidagi rahbarlardan tortib mahalliy amaldorlargacha shaltag‘ini chiqarib so‘kkani mojarosi OAVlaru ijtimoiy tarmoqlargacha shov-shov bo‘lyapti. 

Hammaning og‘zida bitta gap: “Hokim prezident tayinlagan vazirlarni so‘kdi”, “Uning og‘zi shaloq”, “Mahalliychilik qilyapti”, “U o‘zi o‘ylayotganidek hokimiyat tayanchi ham emas, prezident tayanchi ham emas”.

Biz bu gaplardan sal uzog‘roqda turgan holda hokimning o‘sha yig‘ilishdagi so‘kinishlarini chetlab o‘tib, e'tiboringizni u tilga olgan ulkan korruptsiya masalalariga qaratishni lozim topdik. 

Zero, respublika va mahalliy darajadagi korruptsiya illatlariga oid bu gaplar e'tibordan chetda qolishi kerak emas. 

Chunki hamma hokimning so‘kong‘ichligini birinchi planga chiqarib, aslida xalq mablag‘larining sovurilishini esdan chiqarayotgandek ko‘rinadi. 

Birinchi misol shahar hokimi Dilmurod Rahmatullaev faoliyatiga oid. Bu odam ham so‘kong‘ichlikda Shuhrat Abdurahmonovdan hech ham kam emas. 

Viloyat hokimi uni shahar uchun ajratilgan 48 ta chiqindi tashish mashinasining 16 tasinigina tegishli maqsadlar uchun ishlatib, qolganini shag‘al tashishga chiqarib yuborganligi uchun so‘kyapti

Shahar hokimi bu mashinalarga shag‘al tashityapti, shahar esa chiqindiga to‘liq bormoqda.  

Shuhrat Abdurahmonov shahardagi Nodirabegim istirohat bog‘idagi qurilish ishlariga oid yana bir korruptsiya faktini keltirganki, summani eshitgan odam yoqa ushlaydi. 

Hokimning gapiga qaraganda, Milliy bank bu qurilish uchun o‘tkazgan pulning 400 ming dollari hali ish boshlanmasdanoq o‘g‘irlangan. Yeb qo‘yganlar esa endi “yonib turgan qozondan” chiqish harakatini qilib yotibdi. 

Bu pulni o‘marganlar, anglashilishicha, ilgari Toshkentdagi parklarni ham “jannat” qilib yuborgan. 

Savol tug‘iladi, hali ish boshlanmasdanoq shuncha pulni tuya qilganlar Toshkentda “jannat” barpo etayotganda tomog‘iga tiqin tiqib o‘tirganmi? 

Hokim tilga olgan navbatdagi muammo mamlakat tibbiyot tizimidagi korruptsiya holatlariga tegishlidir. 

“Toshkentdagi bitta i***s bir yerdan import qilib olib kelyapti shpritsni. Uning tepasida 15-20 foizdan hammasi o‘tiribdi. Ularning rizqi qirqildi-da endi”, deydi hokim.

Sohaga yaqin kishilar hokimning bu gaplarida jon borligini aytadi. Umuman, tibbiy ta'minot masalasida marhum prezident Karimov davridagi bunday salbiy amaliyotga hali barham berilmagan.

“Hozir tibbiyot muassasalari ta'minoti uchun avvalgidan ham ko‘p mablag‘ ajratilyapti. Bundan xulosa shuki, davlatning pulini tuya qilish ko‘lami ham oldingidan kattaroq”, deydi ulgurji dori-darmon savdosi bilan shug‘ullanuvchi tadbirkorlardan biri “Eltuz” bilan suhbatda. 

Hokimning iddaolariga javob qaytargan Sog‘liqni saqlash vazirligi esa viloyatda shifoxonalar ehtiyoji uchun sotib olingan tibbiy buyum va dori-darmonlarning muvofiqlik sertifikati ham bo‘lmaganini bildirayotir. 

Agar bu o‘rinda vazirlik haq bo‘lsa, sertifikati bo‘lmagan mahsulotlarni xarid qilganlar, agar hokimlik haq bo‘lsa, Toshkentdagi “foizchi” vositachilarga chora ko‘rish kerak bo‘ladi. 

E'tibor bering, hokim tomonidan aytilgan iddaolar asosida qandaydir ish qo‘zg‘atilgani haqida hali birorta rasmiy xabar yo‘q. Hamma hokimning “so‘kong‘ich og‘zi”ni muhokama qilish bilan band.

Holbuki, bu o‘rinda gap milliardlab mablag‘ to‘g‘risida ketmoqda. Park uchun ajratilgan pulni o‘marganlar, chiqindi o‘rniga shag‘al tashib yurgan mashinalar, sifatsiz (balki sifatsiz emasdir!!!) tibbiy buyum va dori-darmonlar masalalari huquqiy bahosini olishi kerak. 

“Eltuz”ning O‘zbekistondagi hamkori
Eltuz.com

Tag‘in o‘qing
5 yanvar 2023
Qadrli muxlislar. E'tiboringizga Eltuz «600 sekund»ning 2023 yilgi ilk sonini taqdim etadi.+++2022 yilda eng ko‘p tilga olingan o‘zbek vatandoshi ...
28 iyul 2016
Qarshimizda Sovet Markaziy Osiyosida isyonchilik harakatiga qarshi kurashish davrida olingan eng muvaffaqiyatli fotohujjatlardan biri desa bo‘ladigan fotosurat turibdi. Biz ...
2 aprel 2021
Jinoyat kodeksiga o‘zgartishlar kiritilib, prezidentni haqorat qilish besh yilgacha ozodlikdan mahrum etish bilan jazolanadigan jinoyat sifatida belgilandi. Prezident Shavkat ...
26 avgust 2019
Uzoq yillar davomida rejim paxtaqo‘yarlari tomonidan og‘zi ko‘pirib maqtanilgan “taraqqiyotning o‘zbek modeli noto‘g‘ri bo‘lgani” mamlakatning eng yuqori doiralari tomonidan ...
Bloglar
21 aprel 2024
Kartinani kecha uyimga olib keldim. Bir kecha termilib yotmoqchi edim. Lekin imkon bo‘lmadi. Doimgidek hayot ...
6 aprel 2024
Bugungi kunda rus propagandasi faqat rus telekanallari orqali berilyapti degan odam qattiq yanglishadi, chunki propaganda ...
28 mart 2024
Rossiya gumondorlarini qiynagani IShID versiyasini yo‘qqa chiqarmaydi.  Bu yerda bir eski siyqa tryuk ishlatiladi. Spetsslujbada bu ...