UzPoster
9 sentyabr 2019

Yoki investor qo‘rqyapti, yoki kimdir arzon olmoqchi

O‘zbekistonning eng mashhur mehmonxonasi ancha arzon narxda sotuvga qo‘yilganiga bir necha oy bo‘lganiga qaramay, shu paytgacha uning xaridori topilayotgani yo‘q.

Avvaliga 33 million dollarga savdoga qo‘yilgan “O‘zbekiston” mehmonxonasining narxi sentyabr oyiga kelib 8,4 million dollar arzonlashdi. Ammo uning shu narxda ham sotilishi gumon bo‘lib turibdi. 

Hozir bu mehmonxona “Otel O‘zbekiston” qo‘shma korxonasiga tegishli. Uning 80,13 foiz ulushi davlatga qarashli. Savdoga aynan shu ulush qo‘yilgan.  

Uni sotib olganlar 99 yil muddatga “O‘zbekiston” majmuasi binolari va unga qarashli maydonda joylashgan infratuzilma ob'ektlaridan foydalanish huquqini qo‘lga kiritadi. 

Shuningdek, yangi xo‘jayin binoning tashqi ko‘rinishini o‘zgartirmaslik va o‘n yil davomida uning hozirgi faoliyat turini saqlab qolish majburiyatini olishi kerak. 

Savdo shartlariga ko‘ra, mehmonxonaning yangi egasi uning qiymatini uch yil davomida to‘lashi va uni modernizatsiya qilish uchun 100 milliard so‘m, ya'ni 10,6 million dollar investitsiya kiritishi kerak. 

Iqtisodchi, investitsiyalar bo‘yicha tahlilchi O‘roz Haydarov “Eltuz” bilan suhbatda O‘zbekistondagi eng mashhur va, aytish mumkinki, eng gavjum mehmonxonaning narxi bunchalik tez va katta miqdorda tushirib borilishiga shubha bilan qarayotganini bildirdi. 

Uning ta'kidlashicha, hukumatning davlatga qarashli ortiqcha aktivlarni xususiy investorlarga berish qarori juda to‘g‘ridir. 

Ammo u “O‘zbekiston” mehmonxonasini tezda qutulish kerak bo‘lgan davlat aktivlari sirasiga kiritmasligini aytadi. 

“Bilishimcha, to‘rt yulduzli “O‘zbechka” (mehmonxonaning xalq orasida keng tarqalgan nomi- tah.) nafaqat Toshkentdagi, balki butun O‘zbekistondagi shu toifadagi eng ko‘p mijoz keladigan otel hisoblanadi. Shuning uchun uning bahosi juda tez pasayayotgani shubha uyg‘otmay qolmaydi.

E'tibor beryapsizmi, mehmonxonaning narxi avvaliga 33 milliondan 29,7 millionga tushirilgan edi. Oradan ko‘p vaqt o‘tmay, narx 24,7 million dollargacha pasaydi. Bunday aktiv uchun narx juda ham tez arzonlashyapti”, deydi tahlilchi.

Hozir O‘zbekistonda turizm eng jadal sur'atlarda rivojlanayotgan soha hisoblanadi. Mamlakatga kelayotgan sayyohlar soni tobora oshib bormoqda. 

“Aslida bunday sharoitda turizm infratuzilmasi ob'ektlari narxi oshib borishi kerak, – deydi tahlilchi O‘roz Haydarov. – Biz esa teskari jarayonni ko‘ryapmiz.

Bu o‘rinda ikkita xulosaga kelish mumkin. Birinchi xulosa shuki, investorlar hali ham O‘zbekistonga sarmoya yotqizishga ishonch bildirayotgani yo‘q.

Ikkinchi xulosa esa bozor iqtisodiyotiga o‘tayotgan davlatlarga xos korruptsion sxemalarga borib taqaladi. Ya'ni kimlardir shunday qimmatbaho ob'ektni arzonroq narxda olish uchun o‘yin qilmoqda”.

“O‘zbekiston” mehmonxonasi bo‘yicha navbatdagi savdolar 16 sentyabrda o‘tkazilishi rejalashtirilgan. Hozirda bir necha xaridor davlatga qarashli bu aktivga qiziqish bildirayotgani ma'lum qilinmoqda.

“Agar shunday ham arzon narxda savdoga qo‘yilgan mehmonxona bu safar ham sotilmasa, biz aytgan ikkinchi xulosada jon borligi yanada oydinlashadi”, deydi investitsiyalar bo‘yicha tahlilchi O‘roz Haydarov “Eltuz” bilan suhbatda.

“Eltuz”ning O‘zbekistondagi hamkori

Tag‘in o‘qing
5 iyun 2017
Eltuz nashri «Prezidentga maktublar» turkumi ostida Respublika prezidenti virtual qabulxonasiga murojaat etayotgan shaxslarning xatlarini e'lon qiladi. Yil yakunida bu ...
30 oktyabr 2015
Militsiya: -Josuslarni ushladik. Terimga majburlash taqiqlangan, deyishayapti. MXX xodimi: (telefonda) – Bizda majburiy mehnat taqiqlangan? Nahotki? Rassom: Tuz www.eltuz.com
25 iyul 2016
Birinchi vidik rasmini ko‘rganimda fizika matematikaga moslashgan maktabning ikkinchi sinfida o‘qirdim. “Radio” degan jurnalning 1967 yilgi ikkinchi sonini xozir ...
30 avgust 2016
Prezident Islom Karimovning na o‘lik, na tirik ekanligi davlat siri darajasida mahfiy, yangi yurtboshining kim bo‘lishi hamon noma'lumlicha qolarkan, ...
Bloglar
26 noyabr 2022
Nukusdagi voqealarni o‘rganish bo‘yicha parlament komissiyasi taklifi va Qoraqalpog‘iston Jo‘qorg‘i Kengesi iltimosnomasiga ko‘ra, namoyishlarda qatnashib ...
3 noyabr 2022
1906 yilning 3 noyabrida Germaniyaning Berlin shahrida o‘tgan Xalqaro radiotelegrafiya anjumanida SOS signali halokatni bildiruvchi ...
1 noyabr 2022
Ulug‘ o‘zbek shoiri va muholifat lideri Muhammad Solih bilan suhbatning 11-qismi Turk birligi g‘oyasi va ...