Asosiy mavzular
30 noyabr 2020

Navbatdagi ura-ura tibbiyot tizimini malakali kadrlarsiz qoldirishi ehtimoli bor

Prezident Shavkat Mirziyoevning tibbiyot tizimini tubdan qayta qurishga qaratilgan topshirig‘i ortidan hali kasbini to‘liq egallab ulgurmagan talabalar go‘yoki amaliyot o‘tash bahonasida viloyatlarga safarbar etilmoqda.

Sog‘liqni saqlash vazirligining yangi rahbari Abduxakim Hojiboevning buyrug‘iga ko‘ra, tibbiyot oliy ta'lim muassasalarining Qashqadaryo viloyatida doimiy ro‘yxatda turuvchi 5-6-kurs bakalavriat, 1-2-3-kurs magistratura, 1-2-kurs ordinatura talabalari shu viloyatga jo‘natiladi. 

Sog‘liqni saqlash vazirligi Fan va ta'lim boshqarmasi boshlig‘i O‘ktam Ismoilovning mahalliy OAVga aytishicha, bu talabalar aholini ro‘yxatdan o‘tkazish, antropometrik (tana a'zolari o‘lchami) ko‘rsatkichlarni aniqlash va salomatlikni tekshirish tadbirlarida qatnashadi.

Talabalarga bu ishlar uchun haq to‘lamasligini bildirgan SSV vakili safarbarlik keyinchalik boshqa viloyatlarda ham davom etishini qo‘shimcha qilgan. 

Samarqand davlat tibbiyot instituti talabasi ayni shu masalada “Eltuz”ga maktub yo‘llab, “ko‘rinishidan juda ajoyib o‘ylangan qaror”ning salbiy oqibatlaridan ogohlantirdi. 

Uning yozishicha, safarbarlikdan maqsad magistr va ordinator talabalarni o‘z sohasi bo‘yicha muayyan stavka bo‘yicha ishga joylashtirish hamdir. 

“Bu bosqichlarda berilishi lozim bo‘lgan chuqur malakaviy bilimni to‘liq egallamagan talaba qanday qilib o‘z viloyati yoki tumanida soha bo‘yicha ishga qabul qilinishi mumkin”, deb savol qo‘yadi maktub egasi. 

Uning ta'kidlashicha, talabalar borgan joyida ish o‘rganadi, ma'ruzalarni esa onlayn o‘zlashtiradi, degan gaplar mantiqsizlikdir. Chunki u yerda darsni kafedradagidek o‘zlashtirish uchun muhit yo‘q. 

“Tibbiyot institutida har bir dars soati qaysidir kasallik yoki uning diagnostikasi, davolash yo‘llariga bag‘ishlanadi. Lekin bu tsikllardan o‘tilmasdan turib talabalar safarbarlikka jalb qilinyapti. 

Qolaversa, 5-kurslar ham safarbarlikka olinishiga ishonmagandik. Endi bu gaplar to‘g‘ri bo‘lib chiqyapti. Safarbarlikdan maqsad butun xalqni antropometriyadan o‘tkazish ekan. 

Bundan kimga qanchalik foyda? Nima uchun biz otning kallasidek kontrakt pulini to‘larkanmiz-u, bilim olish o‘rniga odamlarning bo‘yini o‘lchab yurishimiz kerak? 

Tibbiyot va talim sifatini yuksaltirish haqida bong uryapsiz-u, amalda buning aksini qilish bilan bandsizlar. Sizlarga yaxshi kadr kerakmi, unda bizni erkin ta'lim olishimizga qo‘yib beringlar. Kimningdir og‘zidan chiqqan bir og‘iz so‘z uchun butun bir avlodning kelajagini barbod qilish shart emas”, deyiladi “Eltuz”ga kelgan maktubda.

Unda ta'kidlanishicha, o‘qish onlayn davom etishi aytilayotgan bo‘lsa-da, internet masalasi hali qanday hal etilishi ma'lum emas. 

O‘zbekiston hududlari esa so‘nggi kunlarda muntazam ravishda elektr ta'minotisiz, demak internetsiz qolgani esa hech kimga sir bo‘lmasa kerak. 

Ma'lum bo‘lishicha, safarbarlik doirasida Qashqadaryo viloyatiga qashqadaryoliklar va Surxondayo viloyati talabalari biriktirilgan.

Talabalar borishi kerak bo‘lgan tuman aniq, lekin safarbarlik qancha vaqt davom etishi noma'lum. 

Dekabr oyidan Samarqand viloyatiga Samarqand, Buxoro, Navoiy viloyatlaridan kelgan talabalar jalb qilinadi.

Jizzax viloyatiga Jizzax, Sirdaryo, Toshkent va vodiy viloyatlari talabalari safarbar etiladi. 

Eltuz.com

Tag‘in o‘qing
13 fevral 2017
O‘tgan juma rasman so‘roqqa tutish uchun Silviri qamog‘iga yuborilgan O‘zbekiston vatandoshi Abduqodir Masharipovning Reina tungi klubiga hujum oldidan kamera ...
26 dekabr 2018
2018 yilning 26 dekabri kuni tarmoqda qop ko‘targan guras-guras Qorbobolarning fotosuratlari paydo bo‘ldi. Ayrim suratlarda Qorbobo kiyimidagi o‘smirlarning Buvayda ...
19 dekabr 2018
Fuqarolik ishlari bo‘yicha Urganch tumanlararo sudi sudyasi Zokirjon Ibragimov 14 dekabr kuni 12 ming AQSh dollarini pora sifatida olayotganida ...
12 sentyabr 2017
12 sentyabr kuni tarmoqda Sirdaryoda tuman hokimining maktab direktorlarini urayotgani aks etgan video tarqaldi. Kun.uz nashri tarqatgan videoda Sirdaryo ...
Bloglar
8 mart 2021
Bundan o‘n yillar oldin, bahorning eng yoqimli pallasi – aprel oyining o‘rtalari edi, Olmaotaga qarab ...
2 mart 2021
Bir og‘aynim qo‘qqisdan men haqimda daholarcha bashorat qilib bunday deb qoldi: Kerak bo‘lsa, ming foiz ...
25 fevral 2021
Bolaligimda mendan 5-6 yosh katta qo‘shni kaptarvoz bola bo‘lardi. Ko‘pincha kaptarlari bizning hovlimizga uchib kelib ...