Document UZ
29 noyabr 2021

Babashevani deputatlikdan olishmoqchi

Tarmoqlarda yalang‘och videosi tarqalgani ortidan Toshkent viloyati O‘rtachirchiq tumani hokimligi binosida 3 dekabr kuni bo‘ladigan yig‘ilishda 43 yoshli deputat Feruza Babasheva deputatlik maqomidan mahrum qilinishi mumkin. Toshkent viloyati mahalliy deputatlarining telegram guruhidagi «Eltuz» tanishgan e'londa shu kuni Babashevaning deputatlikdan haydalishi masalasi ko‘rilishi aytilgan.

Joriy yilning 18 noyabr kuni Xalq deputatlari O‘rtachirchiq tumani kengashi doimiy komissiyasi Xalq demokratik partiyasidan deputat Babashevani daxlsizlik maqomidan mahrum qilgan edi.

Toshkent viloyati O‘rtachirchiq hokimligi binosida Babashevaning deputatlik ishi va odob-axloqi muhokamasiga oid yig‘ilish deputatning ishtirokisiz o‘tgan edi. «Eltuz» bilan suhbatda Babasheva bu holatni tazyiqlarning yangi to‘lqini, deb ta'kidladi: «Daxlsizligimni yechishgani kam ekan, endi deputatlikdan olishmoqchi. Anovi videolardagi shallaqi ayollarga prezident portaliga yozdirishibdi. Kamiga deputatlardan ham yozdirishibdi menga qarshi. Hokimning qo‘li uzun, xohlagan joyiga yetadi. Deputatlar hokimga so‘zsiz bo‘ysunishadi».

«Eltuz» muxbiri holat bo‘yicha mas'ullar bilan bog‘landi. O‘zini kengash kotibasi deb tanishtirgan xodimga ko‘ra, 3 dekabr kuni soat 12 da O‘rtachirchiq tumani kengashining navbatdan tashqari 30-sessiyasi bo‘ladi.

«Kun tartibida reglament va deputatlik odobi bo‘yicha doimiy komissiya raisi Dilorom Zulyorovaning axboroti asosida deputat Babashevaga oid qaror qabul qilinadi. Qaror loyihasi bor, ammo uni sizga bera olmayman», dedi xodim.

O‘tgan safargi yig‘ilishga kiritilmagan Babasheva «Eltuz»ga, shuningdek, yig‘ilish bayonnomasi va natijasi deputat va OAV vakillariga taqdim qilinmagani va oradan bir kun o‘tib ham o‘zining ishtirokisiz o‘tgan yig‘ilish bayonnomasini olmaganini ma'lum qilgan edi.

«Menga deputatlik guvohnomamni bekor qilish talabi asosi, taqdimnomasi ko‘rsatilmadi. Mening ustimdan kelib tushgan shikoyatlardan ham xabarim yo‘q. Faqat ular orasida «Agrobank» ATB Toshkent viloyati boshqarmasi boshlig‘i Muhiddin Qiyomovning arizasi borligidan xabarim bor. Unda men u ishlayotgan bank va uning shaxsini ijtimoiy tarmoqda haqorat qilib, shaxsning ishchanlik qobiliyatiga daxl qilganim aytilibdi.

Ammo 2021 yilning iyul oyida bo‘lgan ushbu voqea yuzasidan men allaqachon holatning yolg‘on va asossiz ekanini tegishli tartibda isbotlab berganman. Yig‘ilishda yana nima muhokama qilingani menga ma'lum emas. Advokatim va yuristimga ham yig‘ilish bayonnomasi taqdim etilmadi. Meni rasman yig‘ilishga chaqirishmadi, kelishim so‘ralmadi ham», dedi deputat Feruza Babasheva.

Foto: Feysbuk sahifasidan. Deputat Feruza Babasheva saylov tadbirida.

Deputat Feruza Babashova uzoq yillar prokuror va Bosh prokuratura tizimida rahbar lavozimida ishlab kelgan Muhiddin Qiyomov bilan shaxsan adovati yo‘qligini, yuzma-yuz nizolashmaganini aytdi. Deputatning so‘zlariga ko‘ra, bir guruh o‘qituvchilar Feruza Babashevaga oyliklari «Agrobank» tomonidan bir foiz naqdlashtirishga ushlab qolinayotgani bo‘yicha arz qilgan.

Babasheva bu bo‘yicha ijtimoiy tarmoqlarda post qoldirgan va chiqishlar qilgan. Chiqishlarida deputatning kuzatuvchilari «Agrobank»ni o‘g‘ri bank, deya izoh qoldirishgan. Buni matndan yulib olib effekt.uz saytida «Agrobank eng o‘g‘ri bank» nomli material chiqadi. Unga deputatning videosi ham ilova qilingan. Video ko‘p o‘tmasdan o‘chirilgan. Biroq «Agrobank» ATB Toshkent viloyati boshqarmasi boshlig‘i Muhiddin Qiyomov tomonidan deputatga tazyiq, bosimlar uyushtirilgan.

Deputatning «Eltuz» muxbiriga ochiqlashicha, ijtimoiy tarmoqlarda aylangan video 2 oktyabr sanasida Toshkent viloyatidagi dala hovlilarning birida bo‘lgan. U yerda deputat yolg‘iz bo‘lmagan. Yana 4 fuqaro bo‘lgan.

Uning aytishicha, qolgan 4 fuqaro uylariga ketkazib yuborilib, faqat Feruza Babasheva so‘roq qilingan. Barmog‘iga ozor berilib, telefoni olib qo‘yilgan. Dala hovliga IIBning uch xodimi va yana oddiy fuqaro kiyimidagi ikki kishi kelgan. Voqea joyida Toshkent viloyati IIB xodimi mayor Ziyodulla Rahimov ham bo‘lgan.

Bu bo‘yicha mayorning o‘zi bilan bog‘lanishning imkoni bo‘lmadi, Toshkent viloyati O‘rtachirchiq hokimligi yig‘ilish bayoni e'lon qilinmaguncha holat yuzasidan ma'lumot berolmasligini bildirdi. Feruza Babasheva 1978 yilda Toshkent viloyatida tavallud topgan. Oilali. Uzoq yillar tuman maktabida direktor va o‘qituvchi bo‘lib faoliyat yuritgan. Bir farzandi bor.

Eltuz.com

Tag‘in o‘qing
21 may 2016
19 may kuni 21 yashar Dushanba turg‘uni Davron Qurbonov shaharning 103-nchi mitti mavzesida taqiqlangan “Islomiy Davlat”ning qora bayrog‘ini osganlikda ...
27 iyun 2017
«Yana otasi boy ikkichilarning omadi kuldi», deydi rassom Tuz bakalavriat va magistratura bosqichiga qabulning 20 iyun kuni chiqarilgan yangi ...
26 yanvar 2022
EltuzTG January 26, 2022 25 yanvar kuni Toshkentning qoq markazida joylashgan “Ogni Tashkenta” restoranida o‘zbek mafiyasining eng ko‘zga ko‘ringan ...
17 may 2021
O‘zbekistonda yaqinda bir qarashda arzimasdek tuyulgan, biroq mamlakatda avj olgan, hokimiyatning barcha bo‘g‘imlari, jumladan, prezident tomonidan qo‘llab-quvvatlanayotgan navbatdagi huquqiy ...
Bloglar
26 noyabr 2022
Nukusdagi voqealarni o‘rganish bo‘yicha parlament komissiyasi taklifi va Qoraqalpog‘iston Jo‘qorg‘i Kengesi iltimosnomasiga ko‘ra, namoyishlarda qatnashib ...
3 noyabr 2022
1906 yilning 3 noyabrida Germaniyaning Berlin shahrida o‘tgan Xalqaro radiotelegrafiya anjumanida SOS signali halokatni bildiruvchi ...
1 noyabr 2022
Ulug‘ o‘zbek shoiri va muholifat lideri Muhammad Solih bilan suhbatning 11-qismi Turk birligi g‘oyasi va ...