Dayjest
1 fevral 2016

Toshkentning qarzlari, firibgarlar va qaynonasini o‘ldirgan kelin

O‘tgan hafta O‘zbekistondagi vaqtli nashrlarning sarlavhalariga boshqa davlatlarga namuna bo‘lishi kerak bo‘lgan «o‘zbek modeli» tashviqotidan tashqari turli real haqiqatga yaqin xabarlar ham chiqdi. Masalan Toshkent shahrining trillionlik qarzlari, shantajchiga yo‘liqqan shifokorlar, tilla firibgarlari, qaynonasini o‘ldirgan kelin va qayinsingil jinoyati…

O‘zbekistondan namuna olib, holiga voy bo‘lishni istaganlar bormi?

“Narodnoe slovo” gazetasi taraqqiyotning “o‘zbek modeli” boshqa davlatlar uchun namuna bo‘lishini da'vo qildi.

Unda yozilishicha, prezident Islom Karimovning oqilona siyosati natijasida mustaqillikning ilk kunlaridan boshlab O‘zbekiston o‘z taraqqiyot modelidan chekinmagan, demokratik davlat va kuchli fuqarolik jamiyati, iqisodiyotni modernizatsiyalash va yangilash yo‘lidan ishonch bilan bormoqda.

Maqola mualliflari I.Karimov mustaqillikning dastlabki yillarida “Turkiya modeli” va “Janubiy Koreya modeli”dan qaysi birini tanlashni bilmay, o‘rtada ancha sarson-sargardon bo‘lganini bugungilar esdan chiqargan bo‘lsa kerak, deb o‘ylasa kerak.

Bundan tashqari, agar ishsizlik va qashshoqlik sababli millionlab fuqaroning xorijiy davlatlarga ish izlab ketayotgani “o‘zbek modeli”ning yaqqol ko‘rsatkichi bo‘layotgan bir paytda boshqa davlatlar bu modeldan namuna olishiga birov ishonarmikin?

Toshkent shahrida trillionlab so‘mlik qarzdorlik bor

“Toshkent oqshomi” gazetasi poytaxt hokimining Toshkentning ijtimoiy-iqtisodiy rivojlanishi yuzasidan shahar kengashi deputatlari oldidagi yillik hisobotiga oid ayrim raqamlarni e'lon qildi.

Unda yozilishicha, Toshkent shahri bo‘yicha debitor qarzdorlik 39,9 trln so‘mni, muddati o‘tgan qarzdorlik 295,6 milliard so‘mni, umumiy kreditor qarzdorlik esa 26,9 trln so‘mni, muddati o‘tgani 1,3 trln so‘mni tashkil etmoqda.

Do‘xtirlardan ham pul “tortsa” bo‘ladimi?

“Toshkent oqshomi” gazetasida kriminal mavzuda e'lon qilingan maqolada aytilishicha, bir ayol sochi to‘kilayotgani uchun dermatolog shifokorga murojaat etgan. Shifokor unga dori yozib bergan.

Bir necha kundan keyin ayol shifokor huzuriga qaytib kelib: “Dorilaringiz allergiya qo‘zg‘atdi. Agar 500 ming so‘m bermasangiz, o‘zingizniyam, oilangizni ham tinch qo‘ymayman”, deya tovlamachilik qilgan.

Do‘xtir ham anoyilardan emas, bu haqda darhol tegishli idoraga xabar bergan. Tovlamachi ayol shifokordan 300 ming so‘m olayotgan paytda qo‘lga tushgan.

Sodda ayollar va ustomon firibgarlar

“Adolat” gazetasi namanganlik ikki lo‘li (ular haqiqatan ham lo‘limi yoki shu rolga kirganmi, gazetada aniqlashtirilmagan) ayol Xorazm viloyatiga “gastrol safar”ga chiqib, sodda ayollarni aldab, tilla buyumlarini o‘zlashtirgani haqida maqola chop etdi.

Unda aytilishicha, firibgarlar qishloqma-qishloq yurib, eski buyumlar sotib olish bahonasida ba'zi ayollarning ishonchiga kirgan va tilla buyumlarining haqiqiyligini tekshirib berish bahonasida ularni qo‘lga kiritgan.

Firibgarlar tilla buyumlarga spirt va yod aralashmasidan tayyorlangan maxsus suyuqlik tomizib: “Mana, tillangiz haqiqiy emas ekan, qorayib ketdi. Ularni zargarga ko‘rsatib, o‘zimiz alishtirib olib kelib beramiz”, degan va o‘zlarining arzon taqinchoqlarini sodda ayollarga garov sifatida qoldirib, g‘oyib bo‘lgan.

Firibgarlar shu yo‘l bilan bir ayolning 3 850 000 so‘mlik, boshqasining 1 800 000 so‘mlik tilla buyumlarini o‘zlashtirgan. Ular yana bir ayolga shunday firib bermoqchi bo‘lganida qo‘lga olingan.

Qotil kelin va qiz

“Tasvir” gazetasining yozishicha, ota-onasining roziligini ololmagani uchun sevgan yigitining uyiga to‘y-tomoshasiz kirib kelgan kelin o‘z qayinsinglisi bilan birgalikda qaynonasi qotiliga aylangan.

Ma'lum bo‘lishicha, hali kollejda o‘qiydigan qizining yengil-elpi yurish-turishidan xavotirga tushgan ona uni koyigan va o‘qishga yubormay qo‘ygan. Oradagi mojarolar sabab kelin va qayinsingil bechora ayolni o‘ldirish rejasini tuzgan. Ayol molxonaga ish bilan kirganida qizi uning boshiga bolta bilan zarba bergan. Keyin esa unga yordamga kelgan yangasi bilan birgalikda ayolni arqon bilan bo‘g‘ib o‘ldirib, jasadning ustiga avvaldan tayyorlab qo‘yilgan benzin sepib, yoqib yuborgan.

Sud hukmi bilan kelin 15 yilga, o‘z onasining qotiliga aylangan qiz esa 7 yilga ozodlikdan mahrum qilingan.

Eltuz.com

Tag‘in o‘qing
29 sentyabr 2020
Prezident Shavkat Mirziyoevning eng ishongan davlat amaldorlari MXX (hozirgi DXX)ning sobiq raisi Rustam Inoyatovning josuslaridir. Bunday aql bovar qilmas ...
18 aprel 2020
«Eltuz» tahririyatga joriy yilning 14 aprel kuni bosh vazir Abdulla Aripov nomiga yuborilgan jamoaviy murojaat nusxasi kelib tushdi. 109 ...
5 mart 2020
O‘zbekiston Respublikasi harbiy sudi 4 mart kuni «Vatanparvar» gazetasi muxbiri 68 yashar podpolkovnik Vladimir Koloshinni 12 yilga ozodlikdan mahrum ...
28 iyun 2021
Bu tabiat va inson huquqlarini himoya qilish maqsadida jamoatchilikning xalqaro banklarga qanday ta'sir o‘tkazishi mumkinligi haqida Benkvoch tomonidan tayyorlangan ...
Bloglar
23 noyabr 2021
Yangi milliy kutubxona qurilishi (yangi milliy teatr qurilishi ham) yangi va yap-yangi O‘zbekistondagi eng keraksiz ...
21 noyabr 2021
Siyosatchi bo‘lish¸ siyosatga kirish bugungi O‘zbekistonda boshni kundaga qo‘yish bilan barobar. Bu haqda Jahongirga yozuvdim ...
11 noyabr 2021
Xalqaro jurnalist «Agneshkaxon voqeasi» ko‘p savollarga javoblarni ochib berdi. Kelinglar, jonajon akkreditatsiyadan boshlaymiz. Aynan ularni ...