Asosiy mavzular
9 iyun 2024

Baxti o‘g‘riga ko‘cha nazoratini kim topshirgan?

“Baxti Tashkentskiy” laqabi bilan mashhur O‘zbekistondagi yagona “vor v zakone” Baxtiyor Qudratullaev va “jinoyat olami”ning yana 36 nafar vakili ustidan bo‘lib o‘tayotgan sudda 5 iyun kuni kutilmagan bayonot yangradi.

“Baxti Tashkentskiy” O‘zbekistonda “ko‘cha”ni nazorat qilishni unga davlat tashkiloti ishonib topshirganini aytdi.

Sudda so‘z olgan 52 yashar Baxtiyor Qudratullaev qamoqdan chiqqanidan so‘ng davlat tashkiloti vakillari unga aloqaga chiqib, mamlakatda yoshlar, sportchilar orasida pichoqbozlik ko‘payib ketayotgani uchun “ko‘cha”ni tartibga solishni so‘raganini bildirdi.

Sudya va o‘g‘ri o‘rtasidagi suhbatdan anglashilgani shuki, “Baxti Tashkentskiy” bilan aloqaga chiqqan shaxslar davlat tashkiloti mas'ullari bo‘lganlar.

“Baxti Tashkentskiy”ning ayni ko‘rsatmasini u bilan birga sudlanayotgan jinoyat olamining yana boshqa yirik vakili – “Kontorskiy” laqabli Abbos Xodjaev ham tasdiqladi. 

Biroq ularning aynan kim ekanligiga aniqlik kiritmadi. Sudya ham bu haqda undan so‘ramadi. Sudya, ehtimolki, bu savolni berib, o‘ziga boshog‘riq orttirib olishidan qo‘rqqan bo‘lsa. Bunisi Eltuzga qorong‘u.

Ammo sudya bermagan savol va uning javobini Eltuz oshkor qiladi.

Bu voqea 2015 yil boshida, qish chillasida yuz berdi.

2014 yil dekabrida Jasliq zonasida jazo o‘tagan “Baxti Tashkentskiy” kutilmaganda Qarshidagi 54-zonaga olib kelinadi va ko‘p o‘tmay amnistiya akti bilan emas balki salomatligi yomonlashgani bois jazoning qolgan qismini o‘tashdan ozod qilinadi.

Baxtiyor Qudratullaev O‘zbekiston jinoyat kodeksining 75-moddasida ko‘zda tutilgan holat, ya'ni kasalligi bois qamoqdan qo‘yib yuborilgan edi. Bundan ko‘pchilik xabardor.

Ammo, ko‘pchilik xabardor bo‘lmagan, bir jihat ham bor. Baxti Tashkentskiy ozodlikka chiqarilguniga qadar u bilan o‘sha davrdagi eng qudratli tashkilot – Milliy Xavfsizlik Xizmati muloqot o‘tkazgan.

 Demak, ikki manba – iste'fodagi davlat xavfsizligi zobiti va jinoyat olamiga yaqin shaxsning Eltuzga bir-biridan mustaqil ravishda ma'lum qilishicha, “Baxti Tashkentskiy”ga “ko‘cha”ni nazorat qilish topshirig‘ini hozirda Davlat Xavfsizlik Xizmatiga o‘zgartirilgan sobiq Milliy Xavfsizlik Xizmatining sobiq rahbarlari berganlar.

Ularga ko‘ra, Baxti Tashkentskiy va Abbos Kontorskiyni 2014 yil dekabrda muddatidan oldin ozod qilishdan avval ularga O‘zbekiston Milliy Xavfsizlik Xizmati uyushgan jinoyatchilikka qarshi kurashish bo‘limi boshlig‘i Ulug‘bek Nuriddinov ko‘chada tartib o‘rnatishni so‘ragan.

Sobiq MXX zobitining ta'kidlashicha, Ulug‘bek Nuriddinov “poryadok kilinglar, bu topshiriqni shaxsan general Shuhrat G‘ulomov beryapti, bu – davlat topshirig‘i, O‘zbekistonda yoshlar orasidagi “bespredel”ni to‘xtatish kerak” deb aytgan.

Mana oradan salkam 10 yil o‘tib Baxti Tashkentskiyni yana panjara ortida ko‘rib turibmiz. U bilan birga Abbosni ham. Ular bilan muloqot olib borgan shaxslarning ba'zilari qamoqda, ba'zilari iste'foga chiqqan va yana ba'zilari hamon nomi o‘zgargan tashkilot kabinetlarini band qilib o‘tirishibdi.

Shu yerda maqolamizga nuqta qo‘ysak bo‘lardi.

Ammo, shu joyda yana bir mantiqiy savol tug‘iladi: Qanday qilib qattiq qo‘riqlanayotgan va jurnalistlar kiritilmayotgan suddan aynan Baxti Tashkentskiyning ko‘chani nazorat qilishga oid muzokaralar haqidagi ko‘rsatmasi sizib chiqdi? Bundan kim manfaatdor?

Bu savollar hozircha ochiq qoladi.

Tag‘in o‘qing
17 aprel 2018
O‘zbekiston prezidenti Shavkat Mirziyoevning Qirg‘izistonga tashrifi paytida unga suiqasd qilishda ayblanib, 15 yilga qamalgan 30 yashar Dostonbekning otasi Xursandbek ...
14 iyun 2016
ShHT sammiti yaqinlashgan sayin o‘zbek hukumatining ho‘jako‘rsin tadbirlari ko‘lami ortmoqda. Rasmiylar o‘z harakatlarini Vazirlar mahkamasining “Toshkent shahri magistral ko‘chalarini ...
25 aprel 2022
Eltuz pochtasiga kelgan navbatdagi videoda Toshkent-Xorazm yo‘nalishidagi Xalqaro ahamiyatga ega asosiy magistral yo‘lning 27 kilometridagi qazib tashlangan joylar aks ...
26 aprel 2021
Prezident Shavkat Mirziyoevning kenja kuyovi Otabek Umarov O‘zbekistonga qaytdi. Bu haqda aktyor Dilshodbek Kattabekov o‘zining Instagram sahifasida ma'lum qildi. ...
Bloglar
28 may 2024
Men millatchi emasman! Lekin qaytadan ta'mirlatilgan va Toshkent shahrining sobiq hokimi J. Ortiqxo‘jaev tomonidan Pasxaga ...
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...