Oltinko‘lda ham bolalar terimga jalb etildi

Eltuz manbalariga ko‘ra, tuman bo‘yicha hozircha uchta maktab o‘quvchilarining paxta terimiga chiqarilgani haqida aniq ma'lumotlar bor. Bular Oltinko‘l tumani, 16-17-18-son maktablarining o‘quvchilaridir.

Eltuz manbasi shuningdek paxta terimiga chiqarilgan 7-sinf o‘quvchilari bilan suhbatlashganini bildiradi. Uning tasdig‘icha boshqa maktablar ham bu yil paxtaga jalb etilgan bo‘lishi mumkin.

«Chunki Oltinko‘l hokimi shunaqa odam, faqat o‘tgan yiligina bolalar ommaviy tarzda paxtaga chiqmagan bo‘lishi mumkin, undan ilgari ham olib chiqilgan», – deydi u.

Bu yil terim mavsum boshlanishida avvaliga, bolalar majbur emas, biro ota-onalar paxtaga chiqarilsin deyilgan. Biroq ota-onalarning jalb etilishi unchalik foyda bermagach, ularga “ikki ming so‘mdan pul olib kelasizlar” deyishgan. Biroq yetarli pul yig‘ilmagach, ota-onalari paxta uchun pul to‘lamagan bolalar paxtaga majburiy jalb etilgan.

Bundan ilgari Kasbi tumanida ham maktab o‘quvchilari paxtaga jalb etilgani xabar qilingandi.

«Bu yil odamlar paxtadan qiynalib ketishdi, ayniqsa shifokorlar va o‘qituvchilar», – deydi Eltuz manbasi. Uning so‘zlariga ko‘ra o‘tgan yakshanba va bugun dushanba kunlari ham Oltinko‘l tumanida hamma paxtaga aytilgan.

Tuman hokimi paxta safarbarligini 20 oktyabrgacha cho‘zgan. Oltinko‘llik o‘quvchilar dalada paxta qolmagani, zo‘rg‘a bir-bir yarim kilodan terib kelishayotganini aytishmoqda.

Eltuz.com