Olimpiadaning afg‘on qahramoni

Suratda afg‘onistonlik sportchi ayol Kamiya Yusufi. Parij-2024 Olimpiadasida Kamiya Yusufi Tolibon hukumatiga murojaat qildi.

100 metr masofadagi dastlabki poygadan so‘ng Kamiya Yusufi kameralarga afg‘on bayrog‘i ranglarida uchta so‘z yozilgan A4 varag‘ini ko‘rsatdi.

Murojaatda «ta'lim», «sport » va «bizning huquqimiz» degan so‘zlar yozilgan.

Tolibon hokimiyatni egallagach mamlakatda xotin-qizlar erkinligi keskin cheklandi.

Qizlarning o‘rta maktabda ta'lim olishi, ayollar ishlashi, sport bilan shug‘ullanishi va siyosiy jarayonlarda ishtiroki qat'iyan chegaralangan.

Parij-2024 Olimpiadasida Afg‘onistondan bor yo‘g‘i 6 sportchi ishtirok etmoqda. Afg‘oniston Olimpiya qo‘mitasi surgunda faoliyat olib boradi.

Tolibon hukumati Olimpiada jamoasida ayollar bo‘lgani sabab ushbu qo‘mita vakolatini tan olmaydi.

Kamiya Yusufi musobaqada g‘alaba qozonmadi. «Men bu yerga medal uchun kelmadim. Men Olimpiadaga afg‘on qizlari uchun keldim. Bugun afg‘on qizlari nomidan gapiraman. Chunki ular gapirolmaydilar. Qizlarimiz ilojsiz, ular hech narsa qilolmaydilar. Ular jim turishi kerak”, dedi sportchi.