Toshkent viloyatliklar uchun yopiq shaharga aylanmoqda

Ayni holatni o‘z karikaturasi orqali hajv qilishga intilgan rassom Elsevar, yonida pasporti yoki propiskasi bo‘lmaganlar militsiya nishoniga aylanganiga e'tiborni qaratadi.

Ular bir necha kunlab Toshkentning sassiq hibsxonasida qolib ketishlari, muttasil jarimalar to‘lashlari mumkin. Ayni paytda vaqtinchalik propiskasi bo‘la turib ham, tekshirilgan payti yonida pasporti bo‘lmagani uchun hibsda 22 kun qolib ketgan 21 yashar abiturient yigitning: «Toshkentni pullik qilib qo‘ying!» degan gaplari bugun og‘izdan-og‘izga ko‘chmoqda.

«O‘zbekiston fuqarolarini o‘z yurtida xo‘rlayotgan militsionerlarning asosiy dardi jarima yig‘ish», deydi surxondaryolik Davron Ozodlikka bergan intervyusida.

U so‘nggi ikki uch oy ichida 3 bor IIV xodimlari tomonidan to‘xtatilgani va 1 million so‘mdan ortiq jarima to‘laganini bildirgan.

Toshkent propiskasi bo‘lmaganlarga 400 ming so‘m jarima belgilangan.

ShHT sammiti arafasida Toshkent shahrida pasport rejimi kuchaytirilgan edi.

Shundan so‘ng viloyatdan borganlar ustidan militsiya reydi kuchaytirilib, yonida pasporti va Toshkentda vaqtinchalik qaydi bo‘lmaganlar qo‘lga olinib, «Panelniy» hibsxonasiga olib ketilayotganidan shikoyatlar ko‘paydi.

Rassom Elsevar
Eltuz.com