Piramidaga yo‘l

«Ahmadboy Chinazskiy» niki ostida feysbukda mikroblog ochgan shaxsning ta'kidlashicha, katta moliyaviy firibgarlikda Ahmadboy ikkinchi darajali shaxsdir.

«3-4 yil avval bu firibgarlik chinozlik Ahmadboy shotir yordamida boshlandi. Ungacha Ahmadboy shotir tovuqfurushlik, hayvonot bog‘iga ba'zida o‘lgan hayvonlar go‘shtini topshirish bilan shug‘ullangan», deya yozadi u so‘nggi bloglaridan birida.

Muallifning fikricha, moliyaviy piramida poydevorini qo‘yish uchun ancha mablag‘ kerak va O‘zbekistondagi real holatdan kelib chiqib qonuniy tadbirkorlik yo‘li bilan bunga erishish mumkin emas.
U firibgarlikning beshta alomatini sanaydi:

1. Yuqori daromadning taklif etilishi;
2. Yuridik asosga ega bo‘lgan birorta hujjatning yo‘qligi;
3. Mijoz keltirganlarga moddiy rag‘batlantirish mavjudligi (sizni olib borib tanishtirayotganlar 10% gacha mukofot olyapti, bundan xabaringiz bo‘lmasligi mumkin);
4. O‘zini reklama qilishda ijobiy obraz yasash harakatlari);
5. Hattoki uning o‘zi bu firibgarlikni tan olib, «menga biror gap bo‘lsa, pullaringni yaqinlarimdan talab qilmanglar», deyishi.

Buning ortidan muallif ayni piramidaning «Nuriddinboy», «To‘xtasin», «Alish», «Hasan-Husan», «Rasul», «55», «Murod», «Qo‘chqor» kabi boshqa o‘nlab «sirli biznes sohiblari» nomlarini keltiradi va ularning hukumat izmidagi qo‘g‘irchoqlar ekaniga sha'ma qiladi.

Hukumatning bu shotirlarini esa u «do‘zax elchilari», deb ataydi.

«O‘ylab ko‘ring, 2-3 yildan buyon, ochiqdan-ochiq, keng ko‘lamda, tadbirkorlik sub'ektlariga oid barcha qonun-qoidalarni buzgan holda kim faoliyat yurita oladi?» deya savol bilan yuzlanadi muallif.

Uning so‘zlariga ko‘ra, «minglab sodda va go‘l odamni aldab xonavayron qilgan, gadoga aylantirgan» biznes tepasida hukumat va uning oliy amaldorlari turibdi.

«Bunga javobgar hukumatdir. Amaldorlar bu firibgarlik oqibatlariga shaxsan javob berishi kerak. Xalq, ko‘zingni och! Bir lahzada hamma narsangdan ajralasan! Ish pishgandan keyin DODingni hech kim eshitmaydi», deya yozadi «Ahmadboy Chinazskiy» niki ortidagi FB yuzeri.

O‘zining yangi suratini eltuz.comga yo‘llagan rassom Adolat ham hukumat tomonidan qo‘yilgan yo‘l ko‘rsatkichiga urg‘u qaratadi.

«Odamlarni piramida degan jarlikka yetaklovchi yo‘lni hukumatning o‘zi ko‘rsatmadimi?» degan savol bilan yuzlanadi u.

Rassom Adolat
Eltuz.com