Toshkentda turk bankasi ochiladi

Shu oyda Turk davlat banki Ziraat bankasi Toshkentda o‘z filialini ochishi kutilmoqda. Bu haqda 20 iyun kuni O‘zbekiston Bosh vaziri Abdulla Aripov Savdo sanoat palatasi qurultoyida bildirdi.

Biroq mamlakatda sarmoyalar himoyasi yo‘qligi bois, O‘zbekistonda horijiy biznes istiqboli qanday bo‘lishi mumkin?

Masalan, 2012 yili O‘zbekiston kuchishlatar tizimlari turk biznesmenlarini ovlay boshladi. Ularni qamashdi, bizneslarini tortib olishdi, tavon to‘lashga rozi bo‘lmagunlariga qadar qiynashdi.

Toshkent savdo markazi «Turkuaz»ning sobiq egasi Vohid Gunesh ishi bunga misol. Uni iqtisodiy jinoyatlar, soliq to‘lamaganlik va taqiqlangan islomiy harakatga aloqadorlikda (bu ayblovlarni u inkor etadi) ayblandi.

Biznesmen „Halqaro Amnistiya“ tashkilotiga bergan intervyusida, 2012 yili uni 10 oy davomida maxfiy qamoqxonalardan birida saqlashgani, bu yerda uni yolg‘on iqrorga imzo qo‘ymaguniga qadar qiynashgani haqida bildirgan. Keyin uni tag‘in qiynashgan, yuqori martabali MXX xodimlari uni ozod qilish evaziga, Guneshning oilasidan bir necha million dollar tovlashga qaror qilishgan.

U advokat so‘raganida, unga:

«Vohid Gunesh, o‘zingni qo‘lga ol. MXXning butun tarixi davomida, bu yerga tushgan biror odam aybsiz deb e'tirof etilmagan va ozodlikka chiqarilmagan. Bu yerga tushgan har bir odam aybdor va ularning hammasi aybini bo‘yniga olishi shart.»

Vohid Gunesh qamoqxonadagi noinsoniy sharoit, ruhiy qo‘rqitish, kaltaklash va seksual tahqir holatlari haqida yozadi.

«Siz endi ortiq odam emassiz. U yerda sizga raqam berishadi. Sizning ismingiz u yerda hech narsani anglatmaydi. Masalan mening raqamim 79 bo‘lgan. Men endi Vohid Gunesh emasdim, 79 edim. Siz odammas, shunchaki bir raqam bo‘lib qolasiz.”

Gunesh O‘zbekistonda so‘nggi ipigacha talangan yagona horijiy biznesmen emas.

O‘shandan beri nima o‘zgardi? Mamlakatga yangi prezident keldi, biroq, biznesmenlarni sindirayotgan, ularning mulklarini tortib olayotgan tizilma ilgarigidek mavjud.

Vohid Guneshni qiynagan odamlar esa, shu tizilmada ishlashda davom etayotgan bo‘lishsa kerak.

Ayni vaziyat fonida O‘zbekistonda «Ziroat bankasi»ning ochilishi Rassom Tuz karikaturasiga mavzu bo‘ldi.

Rassom Tuz
Eltuz.com