Senator Ortiqova: Ko‘chani o‘qituvchi tozalamasa, kim tozalaydi?

7 iyul kuni Toshkentdagi Xalqaro press-klubda o‘qituvchilarni, kasblariga aloqasiz turli majburiy mehnatlarga muttasil jalb etilishi masalasi ko‘tarildi.

Jurnalistlarning savollariga O‘zbekiston Oliy Majlis senati a'zolari Svetlana Ortiqova va Bahodir Tojievlar javob berishdi.

Qalampir.uz saytining yozishicha, ko‘cha supurish va qishloq xo‘jalik ishlariga majburlash holatlari barcha ta'lim muassasalarga taaluqli ekani, buni har joyda ko‘rish mumkinligini bildirgan jurnalist Barchinoy Jo‘raevaning savoliga javoban senator Baxodir Tojiev, o‘qituvchilardan majburiy mehnat bo‘yicha biror shikoyat tushganini hech eshitmaganini aytdi.

Senator Svetlana Ortiqova «tashqaridan kelgan odam tozalab beradimi?» degan qabilda ozroq demagogiya qo‘shib, ko‘cha tozalash zarurligini tushuntirishga urindi.

«Tozalash ishlarini ham kimdir qilishi kerak-ku» dedi u.

Shu o‘rinda savol tug‘iladi – nimaga haq to‘lanmaydigan qo‘shimcha ishlarni aynan ta'lim va tibbiyot kabi muhim soha xizmatchilari bajarishi kerak?

Hukumat farroshlarini ta'minlashga, fermerlar esa terimchilarni yollashga qodir emas ekan, bu ishlarni sentatorlarga bo‘lib berish ma'qul bo‘lmaydimi?

Rassom Tuz, mamlakat ko‘chalari va dalalaridagi toza havo deputatlar va senatorlar uchun foydali bo‘lardi, degan fikrni aytadi.

Rassom Tuz
Eltuz.com