O‘zbekiston Madaniyat vazirligi vandalizm faktini tekshirmoqda

O‘zbekiston xalq rassomi Bahodir Jalolovning Qo‘qon teatri devoriga ishlangan «G‘arb va Sharq uchrashuvi» deya nomlangan freskasi Qo‘qon shahri amaldorlari tarafidan vayron qilingani yuzasidan Madaniyat vazirligi tekshiruv boshladi.

Asarlari Britaniya, Italiya, Ispaniya muzeylari, Bukingem saroyi, Tretyakov galereyasida osig‘liq o‘zbek rassomi devoriy rasmi, «Anhor.o‘z» sayti jurnalisti Mansur Ibrohimovga ko‘ra, «o‘zbeklarning diniy mentalitetiga zid kelgani uchun xokimiyat tarafidan vayron kilingan».

Taniqli san'atshunos Natalya Musina feysbukdagi sahifasida Bahodir Jalolovning bu asari san'at ishqibozlari va sayyohlari diqqatini tortib kelgani haqida yozadi:

«Faqat shu freskani ko‘rish uchun dunyoning ma'rifatli insonlari va sayyohlari turli mamlakatlardan kelishardi va kelishmoqda! Mening o‘zim Frantsiyadagi, Rossiyadagi, Germaniyadagi do‘stlarimni olib borganman. Ularning barchasi Bahodir Jalolov freskalarining ko‘rib mutaassir bo‘lishgan!»

Bu Bahodir Jalolovning vayron qilingan ilk asari emas. Shu yil boshida «Eltuz» nashri ayni rassomning «Dom kino»dagi freskasi prezident Shavkat Mirziyoevning buyrug‘i bilan vayron qilingani haqida yozgan edi.

Rassom Kirpi
Eltuz.com