Adliya vazirligi faollashayotgan fuqarolik jamiyatini javobgarlik haqida ogohlantirdi

Adliya vazirligining o‘z telegram kanali orqali yig‘ilishlar, mitinglar, ko‘cha yurishlari yoki namoyishlar uyushtirish yoxud o‘tkazish tartibini buzish javobgarlikka tortilishga sabab bo‘lishi haqidagi ogohlantirishi O‘zbekistondagi erkinlashishga harakat qilayotgan fuqarolik jamiyati uchun o‘ziga xos chaqiriqdir.

Vazirlik o‘z ogohlantirishida bunday harakatlar tashkilotchilari ham, ularga sharoit yaratib bergan fuqarolar ham javobgarlikka tortilishi to‘g‘risida eslatib o‘tgan.

Sharoit yaratish deganda bunday tadbirlar qatnashchilariga binolar yoki boshqa mulk (aloqa vositalari, ko‘paytiradigan va boshqa xil texnik uskunalar, transport)ni berish yoki shunday tadbirlarni o‘tkazish uchun boshqa sharoitlarni yaratish tushuniladi.  

Garchi bu ogohlantirish Toshkentda 9 may kuni “Barhayot polk” aktsiyasini o‘tkazish masalasiga bog‘lanayotgan bo‘lsa-da, mohiyatan o‘z huquqlarini talab qilib ruxsatsiz turli yig‘inlar o‘tkazishi mumkin bo‘lgan fuqarolarga ham taalluqlidir.

Bundan avvalroq ijtimoiy tarmoqlarda Toshkent shahri hokimligi “Barhayot polk” aktsiyasini o‘tkazishga ruxsat bergani haqida xabarlar tarqalgandi.

Keyinroq poytaxt IIBB hokimlikning bunday tadbir o‘tkazishga ruxsat berganiga oid ma'lumotga ega emasligi haqida bayonot e'lon qilngan.

Lekin mohiyatan Adliya vazirligining ogohlantirishi aslida so‘nggi vaqtlarda faollashgan fuqarolik jamiyatiga qaratilgandek ko‘rinmoqda.

Jumladan, yaqinda fuqarolik jamiyati faollari bir qancha xalqaro tashkilotlar vakillari, diplomatlar, tadbirkorlar ishtirokida mamlakatdagi “buz-buz”lar yuzasidan yig‘ilish o‘tkazdi.

Rasmiylar ishtirok etmagan bu yig‘ilishda fuqarolarga tegishli ko‘chmas mulklarni buzish bilan bog‘liq huquqbuzarliklar muhokama etildi.

Aynan shu mavzu keyingi vaqtlarda O‘zbekiston rasmiylarining og‘riqli nuqtalaridan biri bo‘lib turibdi. Hatto xalqaro miqyosda bu jarayondagi qonunbuzarliklar haqida gapirila boshlandi.

Bundan avvalroq Sergeli tumanida qurilgan ko‘p qavatli turar joy egalari ipoteka to‘lovi miqdori oshib ketganidan norozi bo‘lib, parlament oldida ruxsat etilmagan yig‘inga to‘plangani xabar qilingandi.

Avvaliga uylarning bir kvadrat metri 2,8 millionga baholanib, keyin narxlar 4,3 million so‘mgacha oshirilgani aholining norozilik sifatida turli yig‘inlar va uchrashuvlar o‘tkazishiga sabab bo‘lgani haqida ijtimoiy tarmoqlar bong ura boshladi.

Adolat izlab Senatga kelgan aholini tinchlantirish uchun hukumat ancha ter to‘kishiga to‘g‘ri keldi. Turli darajadagi uchrashuvlar tashkil etilib, uylar narxi asossiz o‘sib ketishiga yo‘l qo‘ymaslik haqida va'dalar berilmoqda.

Albatta, aholi vakillarining o‘z huquqlari himoyasi uchun bunday chiqishlar qilishi hukumatga ma'qul kelyapti, deb bo‘lmaydi.

Qolaversa, faollarning yig‘ilishlar o‘tkazib, amaldorlarga yoqmaydigan mavzularni ularning burni tagida muhokama qilishi ham ular uchun yoqimsizdir.

Shuning uchun Adliya vazirligining yuqorida tilga olingan ogohlantirish bilan chiqqani aynan shunday holatlarning oldini olishga qaratilgan bo‘lishi ehtimoli yo‘q emas.

Sardor Azim
Eltuz.com