Blogerlarni izohlar farroshiga aylantirmang!
Komil Allamjonovning blogerlar postlar ostidagi izohlar uchun ham javobgar bo‘lishi haqidagi bayonoti qizg‘in muhokama qilinmoqda. Shu muhokamalarda ko‘zim tushgan eng zo‘r fikr mana bu bo‘ldi:
“Undan ko‘ra, Allamjonovning o‘sha bayonoti tagida so‘kininglar, o‘zini aybdor kilamiz”.
Bilasizmi, kimlar ochiq bahsdan qo‘rqadi? O‘z g‘oyasi to‘g‘riligiga ishonmaydigan odamlar.
Bilasizmi, kim tanqid yoki haqorat eshitsa, gapirganning ovozini o‘chirishga urinadi? O‘ziga ishonmaydigan odam.
Shunday ekan, ortiqcha jazo o‘ylab topadiganlar, “blogingdagi haqoratli izoh uchun ham javobgarsan”, deydiganlar aslida o‘zining haqligiga ishonmaydigan, birovning tanqidiga asosli javob berolmaydigan odamlardir.
Ochig‘ini aytsam, o‘zbek qonunchiligida bu masalada nima deyilgan, rostdan shunaqa choralar nazarda tutilganmi-yo‘qmi, bilmadim. Shunga bir narsa deyolmayman. Lekin jahon amaliyotida shunga o‘xshagan narsa bor. Sizga tegishli kanalda, blogda, saytda kimdir ektremistik fikrlar, irqchilik, millatchilik va ksenofobiya ruhidagi izohlar qoldirsa, uni o‘chirish kerak. Haqorat va tuhmatning ham jazosi bor, albatta.
Lekin buning chegarasi qonunchilikda aniq belgilab berilishi lozim. Aks holda biror amaldor vakolatidan foydalanib ozgina kinoya gapni ham, masxaraomuz izohni ham o‘zicha haqorat deb baholab yuborishi mumkin. Masalan, men bu postni “Komiljon og‘a, bugun avjiga chiqdingiz”, deb boshlamoqchi edim, u kishi hazilni ham haqorat deb baholamasinlar, deb qo‘rqdim.
Keling, hamma o‘zi uchun javob bersin. Bloger – posti uchun, o‘quvchi – izohi uchun. Blogerlarni izohlar qorovuliga va erkinlik tsenzoriga aylantirmang.
Eldar Asanov,
Telegramdagi «Asanov formati» blogeri