Eltuz maqolasidan keyin transvestitni tepgan mirshabning pogoni yulindi

Bizga yetib kelgan xabarga ko‘ra 11 yanvar kuni ertalab Toshkentning Chilonzor tuman hokimligida TIIB shaxsiy tarkibi ishtirokida majlis o‘tkazilib, unda transvestitning kaltaklanishi va qolganlarning tiz cho‘ktirilishi aks etgan video muhokama qilingan.

Qatortol mavzeidagi kvartiralardan birida olingani aytilayotgan ushbu viderolik haqidagi axborotni bu yil ilk bor Eltuz nashri 4 yanvar kuni e'lon qilgan edi.

2015 yil avgustida tarmoqqa qo‘yilgan video asosida Eltuz chop qilgan «Toshkentda transvestitlar ovi» maqolasidan keyin bu voqeaga e'tibor kuchaydi.

Majlisda yigitning yuziga tepib zo‘rovonlik ko‘rsatgan ahloq bo‘limi kapitani va profilaktika inspektori bo‘lgan katta leytenantning majlis ishtirokchilari qarshisida pagonlari yulingan.

Eltuz manbasining aniqlashicha, majlisda yuqori militsiya mulozimlaridan, dekabr oxirida mansabga tayinlangan Toshkent shahar militsiyasining yangi boshlig‘i Bahodir Qurbonov ishtirok etgan.

Manbaga ko‘ra, ushbu viderolik, shahar ichki ishlar bo‘limi (ShIIB) surishtiruvi, militsiya ichki yo‘riqnomaning 69 moddasi, ya'ni “qonunni buzish va aholi orasida militsiya xodimlarining obro‘siga salbiy ta'sir ko‘rsatish” ayblovi bilan ikkala militsiyaning ham ishdan haydalishiga sabab bo‘lgan.

Eltuz.com