Garov evaziga Toshkentga qaytgan Bahromovlar DXX hibsxonasida qolishmoqda

Toshkent tumain hokimligi kafolati bilan Turkiyadan qaytgach, 26 iyunda hibsga olingan yirik tadbirkorlar Obid va Olim Bahromovlar Davlat xavfsizlik xizmatining «Gvardeyskiy»dagi hibsxonasida qolishmoqda.

Advokat Farhod Tursunovning «Eltuz»ga bildirishicha, 3 iyul kuni ham ahvol o‘zgarmagan va ularning oldiga yaqinlari qo‘yilmayapti.

«Kuniga ikki martadan prokuraturaga boryapman. Jinoyat ishi kelib tushgan, biroq tergovchi hali aniqlanmaganmish», deydi Tursunov.

Uning so‘zlariga ko‘ra, mijozi oldiga hamon na uni, na qarindoshlarini qo‘yishayotgani yo‘q. So‘nggi bor Bahromovlarga uning yaqinlari faqat «peredacha» – kiyim-bosh va oziq-ovqat kiritishga muvaffaq bo‘lishgan.

Tursunovga ko‘ra, Bahromovlarning qamoq jazosi garov to‘lash sharti bilan almashtirilganidan keyingina ular 7 iyun kuni Toshkentga qaytishgan edi.

Biroq dastlab ish prokuraturaga oshirilgan, keyin tag‘in Davlat xavfsizlik xizmati tergovchilariga qaytarilgan.

Undan keyin esa DXX xavfsizlik chorasi sifatida ularni hibsga olishga qaror bergan.

Kriminal doiralarda «Obid karam» va «Obid vagon» nomini olgan Obid Bahromovning Xusan Moskovskiy (Husan Ziyomuhammedov)ning sherigi ekani aytiladi.

Biroq Bahromovlar bilan birga ishlagan yaqin qarindoshlari «Eltuz» muxbiriga bu gaplar xavfsizlik xizmati o‘ylab topgan tuhmat ekanini aytdi.

Ularning aytishicha, Bahromovlarning kenjasi Ravshan 2015 yili 17 yilga qamalganidan so‘ng akalari qochishga majbur bo‘lishgan edi.

2018 yilning martida prezidentning biznesmenlarni vatanga qaytarish haqidagi gaplari ularni Toshkent tumani hokimligi kafolatini olish uchun harakat qilishlariga undagan.

Ayni paytda Bahromovlar noqonuniy valyuta ayirboshlash, soliqdan qochish, savdo va xizmat ko‘rsatish qoidalarini buzish, pora berish va jinoiy faoliyatdan olingan daromadlarni legallashtirish kabi jinoyatlarda ayblanib, 15 yilga qamalishlari mumkin.

Eltuz.com