Xorazmlik faollarning Mahmud Rajab himoyasiga namoyish o‘tkazish arizasi rad qilindi

Bir guruh faollarning 13 avgust kuni shoir Mahmud Rajab himoyasiga norozilik namoyishi o‘tkazishni so‘rab Xorazm viloyati hokimiga, viloyat IIB va viloyat televideniesiga bergan arizasi rad etildi.

Faollar ilgari Mahmud Rajabdan musodara etilgan muxolifatchi shoir va siyosatchi Muhammad Solihning kitoblari, shuningdek, noutbuk va qo‘l telefonini qaytarishni talab qilishmoqda.

Mahmud Rajabning umr yo‘ldoshi Gulchehra Bekmonova «Eltuz»ga u o‘g‘illari va boshqa yaqinlari bilan toki shoirni, uning ishini surishtirayotgan tergovchi suhbatga taklif qilmaguncha, tunni viloyat IIB binosi oldida o‘tkazishganini bildirdi.

«Arizamizga odatdagidek rad javobi berishdi. Ertasi kuni tergovchi Umrbek Yo‘ldoshev meni qabul qildi. Ikki soat gaplashdi. Ko‘proq yaxshi va'dalar berdi. Men o‘z talabimda qolishimni aytdim», dedi «Eltuz»ga 14 avgust kuni IIB xodimi qabulida bo‘lgan Mahmud Rajab.

Gulchehra Bekmonovaning qo‘shimcha qilishicha, 13 avgust kuni ichki ishlar xodimlari ichki ishlar bo‘limi oldiga kelgan faollarni tasvirga olayotgan bloger Nafosat Olloshukurovaga bosim ko‘rsatib, uning telefonini olib qo‘yishga urinishgan.

Tahdidlardan cho‘chigan Olloshukurova shu kuni o‘zining feysbuk sahifasida Toshkentga ketishga majbur bo‘lganini bildirgan edi.

Olloshukurova feysbuk sahifasiga qo‘ygan videolarda Mahmud Rajabni qo‘llab-quvvatlayotgan faollar bilan muloqotlar ham aks etgan.

«Erk» demokratik partiyasining urganchlik 83 yoshli faoli G‘oyibnazar Qo‘shjonov kitoblarning taqiqlanishiga qarshi ekanligini aytadi.

«Tarixni eslaylik. Muhammad Solih – Mustaqillik deklaratsiyasi muallifi, milliy mustaqillikni himoya qilib chiqqan shaxs. Bugungi kunda kutubxonalarda eski mafkura, Leninning kitoblari ham turibdi. Shularning o‘rniga Mahmud Rajab keltirgan kitoblar qo‘yilsa yaxshi emasmi?» deydi Qo‘shjonov tarmoqda e'lon qilingan videoda.

«Chingiz Aytmatov e'tirof etgan buyuk klassik shoir Muhammad Solih ustidan xulosa chiqargan bu ekspertlarni men o‘rmonda yurgan quyonchalarga o‘xshataman. Bu quyonchalarni ayiq nima qilishini o‘zingiz yaxshi bilasiz», deydi Mahmud Rajab himoyasiga chiqqan yana bir faol.

Joriy yilning 10 may kuni Mahmud Rajabning uyida tintuv o‘tkazgan IIB xodimlari uning noutbuki, qo‘l telefoni, shuningdek, Muhammad Solih va Muhammad Bekjon kitoblarini olib ketishgani haqida «Eltuz» xabar bergan edi.

Joriy yilning 17 iyulida chiqarilgan 5876-5879/22-sonli ekspertiza hujjatlariga ko‘ra, Mirzo Ulug‘bek nomidagi O‘zbekiston milliy universiteti xodimlari I.Ergashev, A.Muhammadieva, M.Artikov, B.To‘ychiev, N.Abdullaeva, K.Mirzaahmedov, A.Musaev kabi shaxslar Muhammad Solih kitoblarini qoralab xulosa berishgan.

Xorazm viloyati IIB tergov boshqarmasi katta tergovchisi U.Yo‘ldoshev esa ekspertiza xulosasining ko‘zdan kechirish qismidan norozi bo‘lgan Mahmud Rajabning iltimosnomasini rad qilgan.

Eltuz.com