Shinjon koronavirus changalida

Xitoy hukumati 5‏ fevralgacha Shinjon-Uyg‘ur muxtor tumanida «Uxan virusi»ga chalinganlar soni 32 kishiga yetganini e'lon qildi.

Muxtor tuman Sog‘liqni saqlash qo‘mitasining bildirishicha, koronavirus bilan xastalanganlarning 25 nafari Uyg‘ur muxtor tumanida, 7 nafari esa Bintuanda aniqlangan. 

Lekin kuzatuvchilar kasallikni yuqtirganlar soni bundan ancha ko‘p bo‘lishi mumkinligini aytmoqda. 

Mahalliy hukumat virus tarqalishiga oid ma'lumotlarni “davlat siri” sifatida ochiqlamayotgani sababli haqiqiy vaziyatni bilish qiyin kechmoqda. 

Garchi «Uxan virusi» keng quloch yozgan, ommaviy tahdidga aylangan bo‘lsa ham Shinjon-Uyg‘ur muxtor tumani mulozimlari Xitoy hukumatining kuchli bosimi tufayli shu paytgacha Uxan bilan havo, temir yo‘l va avtomobil transporti qatnovini cheklashga intilmayapdi.

Ba'zi kuzatuvchilar bu uxanlik minglab xitoylarning Shinjon-Uyg‘ur muxtor tumaniga oqib kirib, virus tarqatishning yashirin manbasiga aylanishiga yo‘l qo‘yilayotganini anglatishini ta'kidlamoqda. 

Shinjon-Uyg‘ur muxtor tumani Sog‘liqni saqlash qo‘mitasi hisobotiga ko‘ra, 5 fevral kuni tumanda yana 3 kishi koronavirus yuqtirgani aniqlangan va shu tariqa bemorlar soni 32 nafarga yetgan. 

Koronavirusga chalinganlarning 12 nafari Urumchida, 7 nafari Ili viloyatida, 1 nafari Turfonda, 1 nafari Oqsuda, 4 nafari Harbiy rayon 7‏-diviziyasida, 2 nafari Harbiy rayon 8‏-diviziyasida, 6 nafari Harbiy rayon 9‏-diviziyasida kuzatilgan. Ularning 8 nafari og‘ir ahvolda.

Xitoy Sog‘liqni saqlash qo‘mitasi 5 fevral e'lon qilgan hisobotda  5 fevralgacha mamlakatda mazkur virusdan vafot etganlar soni 430 kishiga yetgani, bemorlar soni esa 20 mingdan oshgani aytiladi.

«Nyu-York tayms» gazetasining 3 fevraldagi sonida yozilishicha, Xitoyda koronavirusga chalinganlar va vafot etganlar soni 2003‏ yilda tarqalgan sars virusidan vafot etgan va xastalikni yuqtirganlar sonidan ancha oshib ketgan.

Eltuz muxbiri