Asosiy mavzular
3 fevral 2021

Surxondaryoda tanqidchi bloger Otabek Sattoriy hibsga olindi

Joriy yilning 30 yanvar kuni Termiz shahrida Surxondaryo viloyati Ichki ishlar boshqarmasi tergov bo‘limi xodimlari tomonidan yutubdagi «Xalq fikri» kanali asoschisi, 42 yoshli bloger Otabek Sattoriy hibsga olindi. 

Surxondaryo viloyati IIB katta tergovchisi X.Xushboqov imzolagan tintuv o‘tkazish qaroriga ko‘ra, «fuqaro To‘raev Lochin Aliyorovich arizasi yuzasidan 30.01.21 yilda viloyat IIB xodimlari tomonidan o‘tkazilgan tezkor tadbirda Termiz shahrida yashovchi Otabek Sattoriy fuqaro To‘raev Lochindan tovlamachilik yo‘li bilan kimyoviy ishlov berilgan, narxi 5.040.000 so‘mlik bitta “Vivo-X50” rusumli qo‘l telefoni olgan vaqtida tadbir ishtirokchilari tomonidan ashyoviy dalil bilan ushlangan». 

«Fuqaro Sattoriy Otabek ustidan Jinoyat kodeksi 165-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda», deyiladi Surxondaryo viloyati IIB xabarida.

«O‘g‘limiz to‘rt kundan beri qamoqda qolmoqda. Hozirgi ahvoli haqida hech narsa bilmaymiz», dedi Otabekning 3 yanvar kuni «Eltuz» suhbatlashgan otasi Abdumannon Sattoriy.

Blogerning yaqinlari «Eltuz»ga jo‘natgan videoda blogerning hibsga olinishi jarayoni aks etgan. Videoda darvoza oldida to‘xtagan mashinadan blogerning tushayotgani, shu zahoti ikkita oq mashina yetib kelgani, unda fuqarolik kiyimidagi shaxslar tushib kelgani aks etgan.

Ularning ikkitasi blogerni ushlab, o‘z mashinasiga o‘tqazadi. Oradan ikki daqiqa o‘tgach, mashina ushlangan Otabek bilan birga jo‘nab ketadi.

Otabek Sattoriyning otasi, 69 yoshli Abdumannon Sattoriy «Eltuz»ga voqea tafsilotlarini gapirib berdi:

«Bu telefonni aslida Sherobod hokimi yuborgan. Bu sovg‘ani yuborgani sababi, Otabek Sattoriy yana bir bloger Farhodjon Ismoilov bilan «O‘zbekiston prezidenti buyrug‘iga asosan, tuman va shaharlarda qishki-kuzgi mavsumga atab yarmarkalar tashkil etilishiga bag‘ishlangan tadbir»ni o‘rganish uchun Sherobod tumaniga borishgan.

U yerda bozorqo‘mning odamlari «Nimaga ruxsatsiz bu yerga keldilaringiz, rastalardagi mahsulotlarni ruxsatsiz suratga olayapsizlar», deb Otabekni urib, kurtkasini yirtishgan, telefonini sindirib tashlashgan…».

Blogerning otasiga ko‘ra, shundan keyin Sherobod hokimligidan qo‘ng‘iroqlar bo‘lgan, singan telefoni o‘rniga yangi telefon olib berishni va'da qilishgan.

30 yanvar kuni Otabek (blogerning otasiga noma'lum shaxslar) olib kelgan qog‘oz paketga o‘rog‘liq telefonni olayotgan paytida hibsga olingan.

Blogerning yaqinlariga ko‘ra, shu kuni ikkita xolis va bir qancha ichki ishlar xodimlari ishtirokida uning uyida tintuv o‘tkazilgan, blogerning kompyuteri, beshta flesh karta va unga tegishli boshqa buyumlar musodara qilingan. 

Otabek Sattoriy 2013 yili ochilgan «Xalq fikri» yutub kanali muallifi sifatida Surxondaryo aholisi muammolarini yoritib keladi.

«Xalqim uchun kurashib, uning duosini olib yashashga nimalar yetsin! Har kim ham duo uchun ishlay olmaydi, DUX yetmaydi», deb yozilgan uning kanali tavsifida.

Ayni maqola nashrga tayyorlanayotgan 3 fevral kuni tushdan keyin «Eltuz»ga sud ushbu holat bo‘yicha allaqachon ajrim chiqargani ma'lum bo‘ldi.

Sudga raisi Y.Yo‘ldoshev 1 fevral kuni chiqargan ajrimda «ayblanuvchi Otabek Sattoriyga ehtiyot chorasi sifatida» qamoq belgilangani va u Termiz shahri 9-tergov hibsxonasida qolishi yozilgan.  

Eltuz.com

Tag‘in o‘qing
9 fevral 2018
yoxud Turkiyada erga tegib olayotgan o‘zbek ayollari haqida 35 yoshli Muslima Turkiyaga ishlagani borayotganida turmushga chiqishni orzu qilmagandi. Avvaliga ...
21 fevral 2021
Turkmanistonda 14 yoshli dzyudochi Sulaymon Tursunboev jangda prezidentning qarindoshiga «yutqazib berish»dan bosh tortgani uchun o‘ldirildi. Fojea fevral oyining boshlarida ...
22 fevral 2019
Jizzaxlik huquq faoli O‘ktam Pardaev «Eltuz»ga bergan intervyusida shahar hokimligi unga qarshi da'vo arizasi bilan fuqarolik sudiga murojaat qilgani ...
30 noyabr 2016
26 minut davom etgan BBS o‘zbek xizmati muxbiri Ibrat Cafo bilan suhbati chog‘ida kichik Islom Karimov shuningdek onasi Gulnora ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...