Toshkent IIB binosidan 33 yashar yigit o‘ligi chiqdi

Toshkent shahar IIB binosidan 12 avgust kuni 33 yashar Doniyorbek Usmonovning o‘ligi chiqdi.

Eltuz manbalari uni IIB uyushgan jinoyatchilikka qarshi kurashish bo‘limi xodimlari urib o‘ldirishganini da'vo qilishmoqda.

Bosh prokuratura bu yuzadan rasmiy bayonot berdi.

Prokuratura bayonotiga ko‘ra, Toshkent shahar Ichki ishlar Boshqarmasi bo‘limi tezkor xodimlari tomonidan 2023 yilning 12 avgust kuni tezkor-qidiruv tadbiri doirasida bosqinchilik va boshqa jinoyatlar uchun gumonlanib olib kelingan fuqaro D.U. shu kuni IIBB ma'muriy binosida vafot etgan.

D.U.ning o‘limi sababini aniqlash yuzasidan sud-tibbiyot ekspertizasi tayinlangan.

D.U.ning vafoti yuzasidan bir qator tergov harakatlari o‘tkazish zarurati tug‘ilganligi sababli, holat yuzasidan Jinoyat kodeksining 206 (Hokimiyat yoki mansab vakolati doirasidan chetga chiqish) va 235 (Qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) moddalari bilan jinoyat ishi qo‘zg‘atildi.

Hozirda Toshkent shahar prokuraturasi tomonidan dastlabki tergov harakatlari olib borilmoqda. Eltuz voqealar rivojini yoritishda davom etadi. Kanalimizga obuna bo‘lishni unutmang.