Allamjonovga suiqasdda gumonlangan shaxs Janubiy Koreyadan ekstraditsiya qilindi

Eltuz sal ilgari xabar qilganidek,  Komil Allamjonovga qilingan suiqasd va hukumat tarkibidagi «tozalashlar» hali ham davom etmoqda.

Xususan suiqasdda gumonlangan Javlon Yunusov Janubiy Koreyadan O‘zbekistonga ekstraditsiya qilindi, qidiruvda bo‘lgan Qozog‘istondagi yana bir shaxsning manzili aniqlandi.

Bosh prokuratura tomonidan Qibray tumanida O‘zbekiston Respublikasi Prezidenti Administratsiyasi Axborot siyosati departamentining sobiq rahbari Komil Allamjonovga nisbatan sodir etilgan qotillikka suiqasd qilish bilan bog‘liq jinoyat ishi yuzasidan tergov harakatlari jadal olib borilmoqda.

Bosh prokuraturaning ma'lum qilishicha, ushbu jinoyatga aloqador ayblanuvchilardan biri Javlon Yunusov Janubiy Koreya Respublikasida qo‘lga olinib, O‘zbekistonga ekstraditsiya qilingan.

Shuningdek, qidiruvda bo‘lgan yana bir ayblanuvchi K.S. Qozog‘iston Respublikasida yashiringan manzili aniqlanib, uning bilan ham tergov jarayonlari davom ettirilgan.

Hodisa doirasida olib borilgan tergov ishlari jarayonida hodisa sodir bo‘lgan joy hamda ayblanuvchilar boshqaruvida bo‘lgan avtomashinalar ko‘zdan kechirilgan. Shuningdek, ular istiqomat qilgan xonadonlarda tintuv o‘tkazilib, ishga aloqador bo‘lgan ashyoviy dalillar aniqlanib olingan.

Tezkor qidiruv natijasida jinoyatga aloqador bo‘lgan 7 nafar shaxs aniqlangan bo‘lib, ulardan 5 nafari qamoqqa olingan Yana 2 nafarga nisbatan qidiruv e'lon qilingan edi.

Bosh prokuratura ma'lumotiga ko‘ra, mazkur jinoyat ishi bo‘yicha tergov harakatlari hozirda ham davom etmoqda.

Eltuz O‘zbekiston oliy hokimiyati bo‘g‘inlaridagi o‘zgarishlarga doir voqealarni yoritishda davom etadi. Kanalimizga obuna bo‘ling, ko‘rsatuvlarimizni kuzatib boring.