Вақт машинаси
28 апрел 2020

28 апрель – Бенито Муссолини ва унинг жазмани Клара Петаччи қатл этилди

Нацистлар Германияси иттифоқчиси, янги Рим империясини қуриш ғоясини илгари сурган Европанинг сўнгги диктаторларидан бири, дуче (доҳий) Бенито Муссолинининг ўлими бугунги кун диктаторлари учун ҳам ўрнакдир.

Иккинчи жаҳон уруши поёнига етаётган 1945 йили Муссолини Миланга келади. Бу вақтда у Италия шимолидаги Вальтеллине водийсида қаршилик ҳаракатларини бошлаш ёки Швейцарияга қочиб яшириниш ниятида бўлган.

Муссолини аввалига ўз иттифоқчилари бўлган немис генералларига мамлакатда ҳали ҳам ҳаракатдаги немис қўшинлари иқтидорда эканини тушунтирмоқчи бўлади, бироқ нацистлар аллақачон таслим бўлганини билгач, қочиш тадоригини кўради.

26 апрель куни Муссолини ўз сафдошлари билан водийнинг Комо шаҳрига келиб, маҳаллий ҳукумат биносига жойлашади. Ўша куни кечаси кичик бир отряд билан Швейцария сари йўлга чиқади.

Муссолинининг кўпчилик сафдошлари ва яқинлари партизанларнинг қасд олишидан қўрқиб, улардан ўзларини четга олишга ҳаракат қилишади.

Жумладан, Муссолинининг рафиқаси ўша куни тонгда эри билан хайрлашади, маршал Грациани эса таслим бўлишни афзал кўради.

Немислардан ҳам кўра ўз доҳийлари душманроқ

26 апрелдан 27 апрелга ўтар кечаси Муссолини ўзига ҳамроҳ бўлган қочоқлар билан қарийб 200 кишилик немис отрядига бориб қўшилади.

Сал ўтиб уларга Муссолинининг жазмани Клара Петаччи, Италия ирқчи партияси саркотиби Алессандро Паволини қўшилади.

Муссо қишлоғи яқинида колоннани партизанлар тўхтатади. Бироқ уларнинг командири колоннадаги немис отрядига йўлида давом этишга рухсат этади.

Немис лейтенанти Муссолинига унтер-офицер мундирини кийдириб, уни юк машинаси кузовига яширган эди. Партизанлар машинани кўрикдан ўтказишганида улардан бири Муссолинини таниб қолади.

Партизанлар асир олинган диктаторни Донго қишлоғидаги бир уйга олиб боришади.

Диктаторнинг 10 йил сарсон бўлган жасади

28 апрель куни соат 16:10 да Мецегра қишлоғи чекасида Муссолини ва унинг жазмани Клара Петаччи қатл этилади.

Муссолини ва Петаччи мурдалари Миланга келтирилади ва Пьяцца Лорето майдонида оёғидан осилади.

Айни майдонда 1944 йилнинг 10 августида 15 нафар аксилфашист партизан қатл этилган эди. Сиртмоқни узишганидан кейин ҳам уларнинг жасади бир муддат оқова сув ариғида ётган.

1 май куни Муссолини ва Петаччининг мурдалари Миландаги қашшоқларга мўлжалланган Чимитеро Мажиоре қабристонидаги номсиз лаҳадга кўмилади.

1946 йили Муссолинининг жасади Доменико Леччизи бошчилигидаги уч нафар ирқчи фашист томонидан қазиб олинади ва ўғирлаб кетилади.

Жасадни ўша йилнинг августида топишади, бироқ ўн йил давомида бир сиёсий қарорга келинмагани боис кўмилмасдан қолиб кетади.

Ҳозирги пайтда Италиянинг сўнгги диктатори жасади у туғилган Предаппио шаҳридаги оилавий қабристонга дафн этилган.

2011 йили Италияда «Доҳийнинг жасади» (итал. Il corpo del Duce) ҳужжатли фильми ишланган.

Eltuz.com

Тағин ўқинг
16 декабр 2019
«Ваъдабоз депутатларни сайлаб чарчадингизми, унда «Қўлдан келганча» партиясига овоз беринг». Телеграм ва ютуб тармоғида 2019 йилги сайлов кампанияси ҳажв ...
4 апрел 2021
Ўзбекистон тарихида илк рўйхатга олинган мухолифатдаги «Эрк» демократик партияси Хидирназар Аллақулов раҳбарлигида таъсис этилган янги социал-демократик партияга қарши тазйиқ ...
25 сентябр 2017
Мирзиёевнинг талабалар, ўқитувчилар ва медикларни пахта далаларидан қайтариш қарори, таъкидлаш жоиз, Жаҳон банки президенти босими остида амалга ошди. Бироқ ...
25 феврал 2024
Бугун ўзбекистонлик профессор олим ва мухолифат арбоби Ботир Норбоев вафот этган кун. У 2019 йилнинг 24 февраль куни 72 ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...