Мирзиёев даврида давлатнинг ташқи қарзлари ошди

2018 йилнинг биринчи ярмида Ўзбекистоннинг ташқи қарзи қарийб 16 миллиард долларни ташкил этди ва ЯИМнинг қарийб 40-45 фоизига яқинлашди. Бу Ислом Каримов давридагига нисбатан анча кўпдир.

Президент Каримов, 2014 йилнинг декабрь ойида, мамлакатнинг ташқи қарзи ЯИМнинг 15 фоизидан ошмаслигини айтганди.

Иқтисодчи Абдусаттор Ҳайдаровнинг «Элтуз» нашрига билдиришича, мамлакат қарзларининг кўпайишига модернизация жараёни сабабдир.

“Четдан машина ва асбоб-ускуналар келиши ортгани мамлакатни модернизациялаш жараёни билан боғлиқ, қурилиш материаллари кўпайгани эса, сўнгги вақтларда бу соҳада иш ҳажми ортганинини англатади”, дейди Ҳайдаров.

Унинг фикрича, ривожланаётган давлатларда ислоҳотларнинг дастлабки босқичида импортнинг экспортдан ортишини табиий қабул қилиш керак.

Ҳамма гап мана шу модернизациялашнинг қанчалик тез самара беришида. Акс ҳолда давлатнинг ташқи қарзи ортиб боради ва бир кун келиб бу бюджетнинг имкониятларини чеклаб қўяди”, дейди иқтисодчи “Элтуз” билан суҳбатда.

Бугунга келиб, ўтган узоқ йиллар давомида Ўзбекистонда иқтисодий ривожланишнинг ўзи бўлмагани, коррупция, авторитар бошқарув тизими туфайли хорижий давлатлар ва халқаро молия ташкилотлари мамлакатга қарз беришдан ўзини тийиб келгани маълум бўлмоқда.

Ҳайдаровнинг таъкидлашича, эндиликда халқаро ҳамжамиятнинг Ўзбекистонга муносабати ижобий томонга ўзгарган.

“Бу вазиятдан имкон қадар унумли фойдаланиб, модернизациялаш самарасини ошириш керак. Акс ҳолда ташқи қарзимиз кўпайиб, унинг иқтисодиётга тушаётган юки оғирлашиб бораверади. Биз тезроқ ташқи савдода мутаносибликни таъминлашимиз ёки ижобий сальдога эришишимиз керак”, деди А.Ҳайдаров.

eltuz.com