Ўқувчига ариқ суви ичириб, нок барги едирган ўқитувчига “чора кўрилди”

Андижон вилоят, Избоскан тумани Луғумбек қишлоғидаги 25-мактабда география фани ўқитувчиси дарсга кеч қолиб келган 6-синф ўқувчисига 2 литр ариқ сувини мажбурлаб ичирган. Бу ҳам етмагандай, нок дарахтининг баргини мажбурлаб едирган. Бир соат ичида боланинг соғлиги ёмонлашади ва вилоят касалхонасига ётқизилади. Бу ҳақда айни мактаб ўқитувчиси 15 апрел куни Элтузга билдирган.

Элтуз телеграм каналида бу ҳақдаги хабар чиққанидан кейин эртаси куни айни воқеани шу мактаб директори Абулхафиз Абдуллаев тасдиқлади.

“Мен  ўша  сиз айтган 25  мактаб  директори  Абдулхафиз  Абдуллаевман. Сиз  айтган  воқеа  яъни  кеч қолган  ўқувчига  сув  ичириш  ёш  ўқитувчи  томонидан  амалга оширилган. Ўша вақтнинг  ўзида ўқувчи  тиббий  кўрикдан ўтказилди. Эртасига туман марказий  поликлиникасида  яна қайта  тиббий курикдан  ўтказилди. Ўқитувчига  эса  интизомий  чора курилди  ва  бундан  кейин  ўқувчини  жазоламаслиги  ҳақида огоҳлантирилди” дея изоҳ берди 25-сон мактаб директори Абулхафиз Абдуллаев телеграм канали орқали.

Айни пайтда, тармоқда дарсга кеч қолган ўқиувчини ғайриинсоний жазолаган ўқитувчига кўрилган “интизомий чора» – яъни бундан кейин ўқувчини жазоламаслик ҳақида огоҳлантириш берилиши мутлақо адолатдан эмаслиги айтилмоқда.

Бундан роппа-роса 1 йил олдин худди шу мактабда 7-синф ўқувчиси ўзини осиб қўйган эди. Шу ўринда мактаб директори Абдулхафиз Абдуллаевнинг депутат эканлигини ҳам айтиб ўтиш жоиз.

Eltuz.com