Cатира
11 июн 2018

Келин-куёвни таксида жўнатган йўлтўсар амалдор

Яқинда ОАВ вакиллари билан учрашган Ўзбекистон ёшлар иттифоқи марказий кенгаши раиси, президентнинг давлат маслаҳатчиси Қаҳрамон Қуронбоев ўзининг зўравонлиги билан мақтанди.

Дабдабали тўйлар ҳақида гапирар экан, Қ.Қуронбоев ўзбилармонларча тўй кортежини тўхтатиб, келин-куёвларни тушириб олиб, таксига ўтқазиб жўнатиб юборганини билдирди.

“Андижон, Фарғона ва Наманганда юрганимда кўчада тўй кортежини кўриб қолдим. Шунда машиналарнинг ҳаммасини тўхтатдим-да, келин билан куёвни тушириб, таксига ўтқазиб, жўнатиб юбордим. Қолган машиналарни эса орқага қайтардим”, деди мамлакат ёшларининг бугунги етакчиси.

Давлат маслаҳатчиси бу хатти-ҳаракатларини кортеж кўчада ҳеч кимга йўл бермай, қатнов хавфсизлигига таҳдид солгани, дабдабали тўйларга қарши курашиш истаги билан изоҳлади.

Кимўзарга, жуда катта сарф-харажатлар билан ўтказилаётган тўйлар Ўзбекистондаги каби қашшоқ жамият учун ортиқча юк эканини бугун кўпчилик тушунади.

Лекин бу иллатга қарши диктаторлик жамиятига хос усулда курашиш, яна ўзининг зўравонлик хатти-ҳаракатини эзгу иш сифатида кўрсатиш, бу ҳақда очиқча баёнот бериб ҳам ҳеч қандай жазога тортилмаслик қанчалик тўғри?

Зеро, Ўзбекистонда ҳали дабдабали тўйларни тақиқлаш ҳақида қонун ёки бошқа бир норматив ҳужжат қабул қилингани йўқ.

Қолаверса, инсоннинг шахсий ҳаётига аралашишга ҳеч ким ҳақли эмас. Ҳатто Ўзбекистон қонунлари ҳам буни тақиқлайди.

Агар президент маслаҳатчиси қуруқдан қуруқ мақтанмаётган бўлса, демак унинг ёнида ички ишлардан кимдир бўлган ва аслида ишни улар қилган. Лекин улар ҳам йўл ҳаракати хавфсизлигига таҳдид қилганларни шундайгина жўнатиб юбориши эмас, балки маъмурий жавобгарликка тортиши керак эди.

Акс ҳолда, яъни Қ.Қуронбоевнинг ўзи кортежни тўхтатиб, худди юқорида баён қилинганидек иш тутган бўлса, бу ўзга идораларнинг ваколатларини ўзлаштириб олиш ҳисобланади.

Аслида бундай ҳолатда президент маслаҳатчиси йўл ҳаракати хавфсизлиги органлари вакилларини чақириши, улар тегишлича маъмурий баённома тузиши ва қоидабузарларни жазолаши керак эди.

Қонун устувор бўлмаган мамлакатларда “мансабдор ҳуқуқи” мезонлари ишга тушади. Юқоридаги воқеа мисолида биз Қ.Қуронбоевнинг ана шундай мезонга таяниб иш тутганини кўришимиз мумкин.

Қ.Қуронбоевнинг бу хатти-ҳаракатлари ижтимоий тармоқларда кучли норозилик келтириб чиқарди. Кўпчилик унинг истеъфосини сўрамоқда.

Президент маслаҳатчиси мақомидаги йўлтўсарнинг бу қилиғи ижтимоий тармоқларда мемлар ва карикатураларга сабаб бўлди.

Бундай кучли реакцияни кутмаган “қаҳрамон” ўз йўлтўсарлигини оқлашга тушиб кетди.

Унинг изоҳидан аслида “келин-куёвларнинг ҳурмати жойига қўйилган ҳолда ўз машинасида кузатиб қўйилгани”, фақат кортеждаги бошқа машиналарга қоидабузарлик учун ички ишлар ходимлари томонидан чоралар кўрилгани ойдинлашади.

“Бу оилалар (келин-куёвнинг) қандай эътироз ҳам билдиргани йўқ, хурсанд бўлиб, тўйлари чиройли ўтди”, дейди Қуронбоев.

Ҳайитдан кейинги хинанинг таъсири ҳақида халқимизда ажойиб гаплар бор. Ёшларнинг уларга ҳукумат томонидан тайинланган етакчига нисбатан кескин салбий муносабати президент маслаҳатчисини довдиратиб қўйган кўринади.

У мансаб курсисининг тафтидан ажраб қолишидан ҳадиксираётгани сезилиб турибди.

Шу ўринда Қ.Қуронбоевнинг хизмат йўлини эсга олиш зарар қилмайди. У кўп йиллар собиқ комсомол сафида ишлаган. Кейин эса комсомолнинг меросхўри бўлмиш собиқ “Камолот” раҳбарларидан бири бўлган.

Дарвоқе, юқоридаги бўлган воқеа иштирокчилари ҳам собиқ комсомол ва собиқ камолотчига бегона эмас. Бугун уйланиш ёшига етганлар бир вақтлар Қ.Қуронбоев “Камолот”нинг “Камалак” ташкилотини (совет давридаги октябрят ва пионернинг муқобили) бошқарган вақтида ўзи тарбиялашга масъул бўлган йигит-қизлардир.

Баҳодир Шариф
Eltuz.com

Тағин ўқинг
10 апрел 2016
Ўзбекистон дорихоналарда сотиладиган дори-дармонларнинг анчагина қисми ноқонуний йўллар билан олиб кирилиши ёки қалбаки экани тўғрисида кўп айтилади. «Диёнат» газетаси ...
3 октябр 2018
Йирик миқдорда товламачилик ва коррупцияда айбланиб, жазо ўтаётгган 46 яшар Гулнора Каримова 2 октябрь куни хусусий учоқда Дубай шаҳрига ...
24 март 2016
Туркманистон президентидан китоб совға олган мулозимлар уни манглайига суртмоқда. Eltuz.com айни ғаройиб сиғиниш ритуали акс этган ҳолатни ҳажв остига ...
4 декабр 2018
Ўзбекистонда Мудофаа вазирлиги қўшинларининг жанговар тайёргарлигини синовдан ўтказиш мақсадида ташкил этилган кенг кўламли ўқув машғулотлари беш кун давом этди. ...
Блоглар
12 феврал 2019
Алишер Навоийнинг навбатдаги юбилейини эсон-омон ўтказиб олдик. У аллақачон ўзбек миллатининг, ўзбек тарихи ва маданиятининг ...
10 феврал 2019
Ўзбек жамиятидаги муҳофазакор қатламнинг турк сериалларига қарши «жиҳоди»нинг ажабланадиган жойи йўқ. Аслида бу масаланинг илдизи ...
5 феврал 2019
Бир вақтлар қадимий Рим салтанатининг тарғибот-ташвиқотчилари сифатида воизлар ва файласуфлар империянинг равнақ топишида катта ҳисса ...