Видео: Гулноранинг коррупция пулларини мамлакатга қайтаришга шошманг!

Бир неча ўзбек фаоллари 23 май куни Швейцария ҳукуматига Ўзбекистоннинг собиқ президенти Ислом Каримовнинг қизига тегишли активларни қайтариш учун шошилмаслик чақириғи билан чиқишди.

Улар, бу пулларни Ўзбекистонда реал аксилкоррупция механизмлари ва ҳақиқий адолат ўрнатилганидан кейингина қайтариш лозимлигини билдиришмоқда

Асосий маълумот

Эслатиб ўтамиз, 2012 йили Швейцария прокуратураси, ҳақиқий эгаси Гулнора Каримова бўлган, Takilant, Swisdorn ва бошқа офшор ширкатлари активлари устидан жиноят иши терговини бошлади.

Швейцария прокуратураси Швейцария банкларида ва бошқа жойларда сақланаётган 800 млн. франкни музлатди.

Шунингдек, пул ювиш иши бўйича жиноят ишини қўзғатди.

800 миллион швейцария франки Гулнора Каримованинг телекоммуникация ширкатларидан уларнинг Ўзбекистондаги бизнесига «рахнамолиги» учун олган пораси эди.

Швейцария прокуратураси ўтказган тергов, Каримова молиявий империясини инқирозга, яқин шерикларининг эса уни жиноятда айблашига ва шунингдек, 2017 йили Каримованинг жиноятда айбланиб, қамалишига олиб келди.

Каримова устидан суд жамоатчиликдан ёпиқ ва халқаро адлия тамойилларининг бузилиши ҳолатида ўтди.

Гарчи Ўзбекистоннинг янги президенти ислоҳотлар олиб бораётганини таъкидлаётган бўлсада, фаоллар ўзбек халқидан ўғирланган пулларни тўғридан тўғри ҳукуматга қайтаришга ҳали эрталигини айтишмоқда.

Активларни қайтариш жараёни коррупцияга қарши механизмлар, мустақил суд ва шунингдек жамиятга ҳисоботдорлик, шаффофлик тамойилларининг ўрнатилиши юзасидан ислоҳотларни рағбатлантириши лозим.

Фильмдан скриншот: «Сorruptistan» N-map – 2017
Eltuz.com