Хоразм ва Қорақалпоғистонга чанг тўфони аралаш туз ёғди

Фавқулодда вазиятлар ва соғлиқни сақлаш вазирлиги расмийлари туз бўронидан жабрланган Қорақалпоғистон ва Хоразм вилоятига учиб келишди.

29 май куни Орол денгизидан қайтган маҳаллий экологлардан бири Октябр Доспаповнинг ёзишича, 26-28 май кунлари денгиз сатхида илгари кузатилмаган миқёсда тўфон кўтарилган, туз аралаш чанг ёмғири Қорақалпоғистон ва Хоразм вилояти ҳудудларига ёғилган.

«Экологик ҳалоқат ёқасидаги денгиз афтидан, – агар «сизлар келмасангиз, мен бораман» қабилида иш тутаяпди», дейди нукуслик эколог Октябр Доспанов.

Унинг сўзларига кўра, ҳозир Нукус кўчаларини шланг билан ювишаяпти. Бироқ табиий офатдан баҳорги экинларга етган зарар миқдори ҳали номаълум.

Хоразм вилоятининг Шовот шаҳрида яшовчи фермер аёлнинг айтишича, чанг тўфони кўтарилган кунлари кўчага болаларни чиқаришмаган, кўчада юриш, нафас олиш ниҳоятда қийин бўлган.

Бугунга келиб дорихоналарда юзга тўсиладиган оддий респераторларни топишнинг иложи бўлмаяпти.

«Оппоқ туз аралаш чанг ёғди осмондан. Бир метр нарини кўриб бўлмасди. Шу куни юзимизни дока рўмол билан тўсиб чиқдик ташқарига» дейди у.

Унинг айтишича, далалар, боғларга ёққан чангли туз натижасида мевали дарахтлар қуриб, қовжираб қуриб қолган.

Хоразм вилояти Урганч шаҳрининг оппоқ туз қоплаган манзаралари акс этган суратлари видеолари ижтимоий тармоқда тарқалди

Манзара ҳудди табиий офат акс этган қўрқинчли фильмларидаги каби бўлди. Ҳудди вулқон отилганидан сўнг, лава кукуни шаҳарга ёғилган каби ҳолат бир сутка давом этди» дейди «Элтуз»нинг Урганчдаги яна бир суҳбатдоши.

Eltuz.com