Асосий мавзулар
30 сентябр 2019

“Биз бахтли бўламиз худо хоҳласа…”

Шанба куни Берлин марказида айланиб юриб, тасодифан бир никоҳ тўйининг гувоҳи бўлдим. Тўй кортежи кажавали биттагина велосипеддан иборат эди.

Тўйда келин-куëв билан қўшиб ҳисоблаганда бор-йўғи 8 киши қатнашди. Тўйдаги егулик-ичгулик велосипед кажавасига жо бўлди.

Келин-куëвлар “Элтуз” нашри учун ўз севги ҳикоясини лутфан айтиб беришди.

Куëв 26 ëшда. Унинг исми Вольф, ўзбекчасига Бўривой бўлади. Германия ўнталигига кирадиган IT ширкатда ишлайди. Ойига 10 минг евродан кўпроқ ойлик олади.

Келиннинг исми Линда. 23 ëшда. PR ширкатда дизайнер. Ойига ўртача 3 минг евро олади.

Улар икки йил мобайнида севишиб, бир-бирини яхши танигач, тўй қилиб умр ришталарини боғлашга қарор қилишди.

Тўй тантанаси Берлиндаги бургерамтда никоҳдан ўтиш расмиятчилиги билан бошланди. Яъни улар загсдан ўтишди. Никоҳдан ўтиш шарафига саккиз киши бир шиша шампан шароби ичишди.

Кейин олдига ëғочдан бўлган қути тиркалган биргина велосипеддан иборат тўй кортежи бир пайтлар Германияни иккига ажратган девор бўйлаб узанган Шлизишес кўчаси бўйлаб юрди.

Орқада келин-куëвнинг кумуш сочлари қуëшда ялтираб кўринган ота-оналари мамнун қадам ташлайди. Уларни суратга олаëтган туристларга қараб жилмайиб, поз беришади.

Келин-куëвлар Трептов паркига яқин жойдаги турклар бит бозори деб айтадиган эски-туски бозорига боришди. Тошкентдаги Тезеков бозорига ўхшаш бу бозорда ҳар хил ашқол-дашқоллар сотилади.

Шу бозордан куëвбола ўз турмуш ўртоғи Линдага совға олиб берди. Пива қопқоғини очадиган бронзадан бўлган очқич. Кейин улар кўчага чиқиб, бозорга ëндош жойдаги паркда “тўй” қилишди.

Энди тўйни тасвирласам. Ўртада кажавали велосипед турибди. Ичида мева шарбати, пива ва маккажўхори қаламчалари дея билганимиз чипс солинган ялтироқ халтачалар.

Тўй харажатлари. Велосипед куëвболанинг ўзиники. Демак текин. Қути ичидаги егулик ва ичимликлар нархи 40 евро атрофида. Меҳмонлар ўзлари билан шароблар олиб келишган.

Куëвболанинг келинга совғаси қиймати 2 евро. Линданинг олдига бориб, “Элтуз” нашри ўқувчиларига бирор нарса айт, деб илтимос қилдим.

Линданинг айтган гапи айнан мана бундай бўлди: Wir werden glücklich sein, wenn Gott will. Буни таржима қилгач, ўзим ҳайрон қолдим – “Биз бахтли бўламиз худо хоҳласа”.

Муҳаммад Юсуфнинг шунақа шеъри бор эди. Дарвоқе, шу кунларда бу шеърнинг хонанда Азиз Насафий тарафидан қўшиқ қилингани тармоқда баҳс бўлмоқда.

Майли-да, кимгадир
Ёқса, ёқмаса,
Уларга қўшилиб
Йиғлашармидик.
Биз бахтли бўламиз
Худо хоҳласа,
Худо хоҳламаса
Учрашармидик…

Eltuz.com

Тағин ўқинг
19 апрел 2016
“Маънавият соҳасидаги энг жиддий хавфли таҳдид ватансизлик ғоясидир. Мафкуравий кураш арсеналида ватансизлик энг хавфли қуроллардан бири ҳисобланади”, деб ёзди ...
29 май 2017
Ўзбекистоннинг кенгайиб бораётган яхна ичимликлар бозори, ўнлаб ўзаро рақобатдош ширкатларнинг тобора шиддатли жанг майдонига айланмоқда. Айни жараёнда “Smile Lux” ...
20 сентябр 2016
Американинг икки шоввоз ватандоши Томас Гаскел Аллен (Thomas Gaskell Allen) ва унинг дўсти Уильям Луис Сахтлебен (William Lewis Sachtleben) ...
28 июл 2016
“Ҳуррият” газетаси ўз муассиси бўлмиш Журналистлар уюшмасига қарашли мониторинг гуруҳининг мамлакат матбуоти жорий йилнинг иккинчи чорагида нима кароматлар кўрсатгани ...
Блоглар
11 декабр 2019
Кун ўтмоқда, сана ўзгармоқда, лекин ижобий ўзгаришлар рўй бермаяпти. Мен Одил Элмурод, ”Эзгулик” инсон ҳуқуқлари ...
10 декабр 2019
Ўзбекистон мусулмонлари идорасида раис ўринбосари бўлиб ишлаган Дилшодбек Ҳошимов ушбу муассасага Жаслиқ қамоқхонаси мулозимлигидан келган ...
9 декабр 2019
Абдували Қутбиддин 8 декабрь куни 59 ёшида Тошкентда вафот этди. Замондошлари наздида у ўзбекнинг далли ...