Асосий мавзулар
4 октябр 2021

Гувоҳлар қотилликда гумон қилинаётган қашқадарёликларнинг айбсизлигини айтишмоқда

Жиноят ишлари бўйича Қашқадарё вилояти судида 4 октябрь куни уч шахс – Миришкор тумани Чандир қишлоғида яшовчи Жонқул Наврўзов, унинг ўғли Алимардон Алламуродов ва жияни Панжи Наврўзов устидан навбатдаги суд мажлиси бўлиб ўтди.

Судланувчиларга қарши Жиноят кодексининг 97-моддасида кўрсатилган “қасддан одам ўлдириш” айблови илгари сурилмоқда. Улар шу қишлоқда яшовчи қариндошлари 62 ёшли Асқар Ҳазратов ва хотини Ўғилхон Айматовани ўлдирганликда гумон қилиниб, жорий йилнинг 8 майида ҳибсга олинган эди. Қотиллик бир йил бурун, 2020 йилнинг 4 октябрида содир бўлган.

«Элтуз»нинг судда иштирок этаётган манбасига кўра, дастлабки суд мажлиси суриштирувларида даъвогар ва айбланувчилар, кейин эса жабрланувчи томон гувоҳларининг иддаолари тингланган.

Асосий даъвогар, марҳумнинг кичик ўғли Иброҳим Пайғамбарқулов ота-онасини ўлдирганликда куёви Панжи Наврўзовни айбламоқда.

Пайғамбарқуловнинг 4 октябрь куни гувоҳлик берган хотини Шалола Жўраева қотиллик содир бўлган куни юзига рўмол ўраган Панжи Наврўзов унинг икки яшар ўғлини ерга босиб ураётганини кўргани, кейин эса уни ҳам уриб ҳушидан кетказганини иддао қилган.

Айбланувчи томоннинг яқинлари ва гувоҳлар эса бу иддаоларни инкор қилишмоқда. Суд танаффус эълон қилган пайтда «Элтуз» бир қанча гувоҳлар билан телефонда боғланишга муваффақ бўлди.

“Марҳумнинг келини иддаолари нотўғри. Чунки шу куни менинг қайним (Панжи Наврўзов) буғдой ўримида, қайнотам (Жонқул Наврўзов) эса қўшнимизникида меҳмонда бўлишган. Эрим (Алимардон Алламуродов) умуман қишлоқда бўлмаган, машинасини олиб келгани Денов шаҳрига кетган эди”, деди Муножот Эгамова «Элтуз»га.

Эгамова, шунингдек, эри, қайнотаси ва қайноғасига нисбатан бўйнига айб қўйиш учун қийноқлар қўлланганини иддао қилмоқда. Унинг «Элтуз»га билдиришича, қайноғаси аввалига қийноқларга дош бера олмай қилмаган жиноятига иқрор бўлган. 

Шундан сўнг Муножат Эгамова ва унинг яқинлари халқаро ташкилотларга видеомурожаат йўллаб, бу ноҳақликларга барҳам бериш ва Туркманистондан бошпана олишга ёрдам сўрашга мажбур бўлган эди. Эгамованинг эри ва яқинларига тергов пайтида қийноқлар қўлланилганининг расмий тасдиғи йўқ.

«Элтуз» суҳбатлашган, шу куни асосий гумонланувчи билан бирга бўлганини айтаётган фермер Замон Ҳакимов воқеа юзасидан ўзининг кичик бир суриштирувини ўтказганини айтади.

“Мен учун Панжи яқин дўстим ё бир қариндошим эмас, шунчаки қўл остимда 6-7 йил ишлаган меҳнаткаш бола. Ноҳақлик бўлаётгани учун ўз ихтиёрим билан гувоҳлик бергани даладаги ишларимни ташлаб судга келиб ўтирибман”, дейди Ҳакимов «Элтуз»га.

Ҳакимовнинг сўзларига кўра, шу куни у кечки 5 яримгача асосий гумондор Панжи билан бирга бўлган, у билан ғалла ҳосилини топшириш учун шийпонга боришган.

Уйига қайтган Панжи хўроз сўйиб, овқат қилган, соат 6.30 ларда қайнотаси (шу куни ўлдирилган Асқар Ҳазратов) билан ўн минутча телефонда гаплашган.

Кейин кечқурун 7.30 ларда овқат пишган. Уни соат 8 ларгача ейишган хотини билан. Кейин қолганини тугиб, қўшниси Баҳодир деган йигитникига унинг касал ўғлини кўришга боришган. Соат 10 ларгача улар ўша қўшниларнинг уйида бўлишган.

Буни судга Панжининг гувоҳлик бериш учун беш кундан бери судга қатнаётган қўшниси Баҳодирнинг ўзи ҳам тасдиқламоқда.

Ҳакимовнинг айтишича, Панжининг ва унинг яқинлари айбсизлигини тасдиқловчи ўнлаб гувоҳлар бор, лекин ўтган ҳафта бошланган суд бу гувоҳларнинг далилларини ҳануз тингламаяпти.

Унинг фикрларини қашқадарёлик маҳаллий ҳуқуқ фаоли, Ўзбекистон инсон ҳуқуқлари мустақил ташкилоти вакили Шукурулло Парпиев ҳам қисман тасдиқлади.

“Бугунги суд мажлисининг яна бир ноҳақлиги журналистлардан суд ҳукми чиққунига қадар унинг тафсилотларини оммавий ахборот воситалари орқали ёритмаслик талаби бўлди. Шундан сўнг маҳкама ишини кузатаётган “Эффект.ўз” журналистлари зални тарк этишди”, деди «Элтуз» билан суҳбатлашган ҳуқуқ фаоли Шукрулло Парпиев.

4 октябрь куни эрталаб бошланган суд кечки 6.00 гача давом этди. «Элтуз» Чандир қишлоғида содир бўлган қотиллик суриштирувига оид суд жараёнини кузатишда давом этади.

Eltuz.com

Тағин ўқинг
5 май 2016
«Гумроҳлар», «Алданган аёл», «Ажал жодуси», «Odnoklassniki» каби бугунги ҳукуматнинг мафкуравий талабларига жавоб берадиган фильмлар режиссёри Ҳилол Насимов бу каби ...
25 феврал 2021
(Муҳаммад Солиҳ аудиокитобининг давоми) Аскарликдан қайтганимда бир миллиятчи эдим. Аммо икки йил давомида ўқиганим бутун адабиётлар рус тилида эди. ...
5 май 2015
«Россия бизни босиб оладими¸байроғимизни юлиб олиб ерга ташлаб ¸бизни қул қиладими бизга барибир. Қорин тўқ чўнтак бут бўлса бўлгани» ...
5 сентябр 2017
5 сентябрдан Ўзбекистонда конвертация эълон қилиниб, АҚШ доллари эркин савдога чиқарилди. Элтуз нашри мухбири Тошкентдаги бир қанча шохобчаларда валюта ...
Блоглар
22 октябр 2021
Ўғил неварасини қўрқитиб, мунтазам зўрлаган тошкентлик амаки ҳақида видео тарқалди. Бу амаки «ножўя жинсий ҳаракат ...
18 октябр 2021
(Таниқли шоир ва сиёсатчи Муҳаммад Солиҳнинг “Императив” китобидан 36-қисм. Аудиокитоб матнини муаллифнинг ўзи ўқиган. Давоми ...
14 октябр 2021
Дастлаб большевиклар Ёш бухороликлар, жадидларнинг коммунистик партияга қўшилган аъзоларидан иборат Бухоро Халқ Совет Республикасини туздилар.  ...