Касбининг муштумзўр ҳокими

Видеода Касби тумани ҳокими Тўхтамурод Мейлиев фермерни уряпти. Воқеа апрел ойида юз берган.

Куни кеча эса мажлисда ҳоким Дўстлик маҳалласи ёшлар етакчиси бўлган ёш қизни куракда турмас сўзлар билан ҳақорат қилган.

Эътирозларга жавобан ушбу валломат ҳоким “хоҳлаган жойингга арз қил, видео аудио ёзиб ол. Ҳеч кимдан, ҳеч нарсадан қўрқмайман,” деб ўдағайлайди.

Элтуз нашри ҳоким Тўхтамурод Мейлиевнинг кирдикорлари ҳақида аввал ҳам бир неча бор танқидий мақолалар чиқарди.

Жумладан, Тўхтамурод Мейлиев пилла йиғими пайтида фермерларга босим ўтказиб, пул йиққан – ҳоким бўш қоғозга фермерлардан қўл қўйдириб, кўчат экиш баҳонасида пул талаб қилган.

Инсайдерларнинг хабар беришича, ҳоким жаноблари ҳар сафар Элтуз танқидидан кейин Тошкентга отланиб, мансабдор “танкалари” ёрдами билан ишни босди-босди қиляпти.

Суратларда Касби тумани ҳокими хонлик давридаги заминдор мисоли фермерларни ўз батракларидек мулзам қилган. Ҳоким ҳеч кимдан қўрқмайди, ҳеч ким унинг қудратига соя сололмайди.

Президент Шавкат Мирзиёев 2017 йилнинг ноябрь ойида ўтказган ҳукумат мажлисида амалдорларнинг муштумзўрлиги ва сўконғичлиги давлат сиёсатига, президент сиёсатига қарши чиқиш деб баҳоланишини айтган эди:

– Гуруч курмаксиз бўлмайди деганларидек, ўз масъулиятини унутиб, оёғи ердан узилган, мен раҳбарман, нима қилсам ҳам меники тўғри деган хато фикр билан ғўдайиб юрган айрим одамлар ҳам йўқ эмас. Уларнинг ўз хизмат лавозимларини суиистеъмол қилиб, қўл остидаги ходимларга қўпол муносабатда бўлаётгани, ҳақорат қилиб, ҳатто қўл кўтараётгани ҳақида бизга кўплаб маълумотлар келиб тушмоқда. Бу бизга умуман номаъқул нарса. Бу иллатни йўқ қилиш керак, – деган эди Мирзиёев.

Аммо Тўхтамурод Мейлиев фермерларни калтаклаб, босим ўтказишда давом этмоқда.

Эртага бирор фермер ҳоким сабабли юрак ҳуружидан ўлса АОКА каби ташкилотлар унинг айбини ёпишга уринади.

Зўравон, фермеркуш ҳокимга қатъий чора кўринг! Мутасаддилар – яна бир фермер қурбон бўлса ойни этак билан ёполмайсиз. Элтуз Ўзбекистондаги муштумзўр, сўконғич мулозимлар қилмишига оид воқеаларни ёритишда давом этади. Каналимизга обуна бўлинг. Видеоларимизга лайк босинг. Агар айрим ёпиқ видеоларни кўришни ёки шунчаки каналимизни қўллаб қувватлашни истасангиз, супер раҳмат кнопкасини босинг. Соғ бўлинг.