Шведларни сўккан ўзбек диний воиз устидан элчихонага арз қилинди

12 август куни бир гуруҳ узбек ва швед ватандошлари Мухтор Аброр Алий таҳаллуси билан танилган диний блогер 48 ёшли Аброр Абдуазимов устидан Ўзбекистоннинг Швециядаги Элчихонаси орқали мамлакат Бош прокуратураси ва Ташқи ишлар вазирига арз қилишди.

Нусхаси Ўзбекистон Ташқи ишлар вазири Бахтиёр Саидов, Ўзбекистон Бош прокурори Ниғматилла Йўлдошевга йўлланган мурожаатда жумладан Ўзбекистонда, шахсларнинг шаъни ва обрўсини камситгани учун муқаддам судланиб маъмурий жазога тортилган диний блогер Аброр Мухтор Алийнинг Швеция ҳукумати, унинг халқи ва бу мамлакатда яшаётган ўзбеклар қадр-қимматига зарар етказувчи чиқишлари хавотир уйғотгани билдирилган.

Сўнгги пайтларда Аброр Мухтор Алий ижтимоий тармоқларда, хусусан, 700 мингдан ошиқ обуначига эга YouTube канали орқали билдирган баёнотлари ўзбек ҳамжамиятида чуқур хавотир уйғотди. У ўзининг чиқишларида Швеция ватандошларини Қуръонни ёқишда айблаб, швед халқини ҳамда ҳукуматини ислом дини ва мусулмонларга қарши сиёсат юргизаётган мамлакат сифатида ҳақорат қилган. Ваҳоланки бу ҳаракатни содир қилган Ироқлик фуқаролар Швеция суди қарори билан мамлакатдан чиқариб юборилган эди.

Шунингдек, Аброр Мухтор Алий ўз чиқишларида швед ватандошлигини олган ўзбекларни асоссиз равишда, “гей”, “голубой”, “бесоқолбоз” дея ҳақорат қилади. У Швецияни ЛГБТ ғояларини ҳимоя қиладиган давлат сифатида мусулмонлар яшаши учун номуносиб мамлакат деб атайди. Бу билан у гомофобия, кснофобия, диний адоват, тоқатсизлик билан йўғрилган ғояларини ўз тарафдорлари орқали дунёга ёймоқда. Бу албатта, нафақат Швециядаги ўзбек жамоатчилиги, балки Ўзбекистоннинг халқаро обрўсига ҳам салбий таъсир кўрсатади дейилади жумладан 10 нафардан зиёд фаоллар имзолаган мурожаатда.

Петицияни Швециядаги Гўзал Султонали қизи, Суният Мамушева, Комила Назарова, Ислом Ҳамидов, Собир Қурбонов, Фарҳод Иноғомхўжаев, Акмал Солиев, Комилжон Шокиров каби ўзбек фаоллари билан бир қаторда Бёрн Никлассон, Фредрик Ёнссон, Кома Адамссон сингари швед миллатига мансуб шахслар ҳам имзолаган.

Уларнинг фикрича, Аброр Мухтор Алийнинг диний адоват, ксенофобия ва гомофобик тоқатсизлик мазмунидаги чиқишлари швециялик ватандошларимизда нафақат ғазаб уйғотмоқда, балки уларнинг Ватанга бўлган меҳрига ҳам путур етказмоқда.

Шулардан келиб чиқиб, улар айни мурожааатлари орқали:

1. Аброр Мухтор Алийнинг ижтимоий (Ютуб, Фейсбук, инстаграм) тармоқларидаги чиқишлари прокуратура ва адлия идоралари томонидан чуқур ўрганлиб чиқилишини;
2. Диний ва сиёсий адоват қўзғашга қаратилган, шунингдек, Ўзбекистон ва Швеция ватандошларининг қадр-қимматини камситувчи чиқишлари юзасидан сиёсий экспертлар хулосаси берилишини;
3. Аброр Мухтор Алийнинг гомофобия, диний ва ирқий адоватга ва шахсларни ҳақоратлашга асосланган барча чиқишлари ижтимоий тармоқлардан олиб ташланишини;
4. Ўзининг айни ижтимоий тармоқлардаги саҳифалари орқали Аброр Мухтор Алий Швециядаги шаъни ва обрўси камситилган барча шахслардан кечирим сўрашини;
5. Миллатлараро ва давлатлараро миқёсда адоват қўзғашга уринганлиги учун Аброр Мухтор Алийга нисбатан БМТ резолюцияси доирасида зарур жазо чоралари кўрилишини талаб қилишган.

Омма орасида зиддиятли ҳамда ЛГБТга қарши кескин чиқишлари билан танилган Аброр Мухтар Алий таҳаллуси остидаги наманганлик 48 яшар диний блогер Аброр Абдуазимов судлангунига қадар Ўзбекистон Ислом цивилизацияси маркази жамоатчилик бўлими бош илмий ходими, Ўзбекистон мусулмонлари идораси Қуръон ва тажвидни ўрганиш бўлими мудири ўринбосари лавозимларида ишлаган.

Ўтган йилнинг февраль ойида суд Аброр Абдуазимовни ижтимоий тармоқдаги саҳифаси орқали журналист Никита Макаренкога нисбатан туҳмат, қадр-қимматни камситувчи маълумотлар тарқатишда айбдор деб топиб, маъмурий жазога тортгани ортидан у барча лавозимларидан озод этилган ва фақат диний пропаганда билан шуғулланиб келмоқда.