Чириган вагонлар ва нархи осмон чипталар

Ўзбекистонда ойлик маошлар йилига бир марта билинар-билинмас ошади. Лекин нарх-наво кунига кўтарилади. 

Жорий йилда «Ўзбекистон темир йўллари» АЖ  фойдаланувчиларни кутилмаган “совға”лар билан сийлади. Аввалига чипталар нархини 20 фоизга кўтарди. Халқ ижтимоий тармоқларда тўполон қилди. Жамоатчилик қарши чиқди. Аммо ҳар галгидек халқ фикрини эшитадиган мард топилмади.

Аксинча орадан икки  ой ўтиб нархлар яна 12 фоизга ошди.  Бунда «Ўзбекистон темир йўллари» АЖ раҳбарияти хизмат кўрсатиш сифати яхшилангани эвазига нархлар ошганини айтишганди. 

Йўллар тирбанд, поезд хизматидан фойдаланиш фуқароларга автобус ва таксилардан кўра қулайроқ. Аммо поездларда аксиадорлик жамияти ваъда берган хизмат кўрсатиш сифати ёмонлашган бўлса ёмонлашганки, яхшилангани йўқ. 

Тошкент-Урганч, Тошкент-Нукус қатновидаги поезд вагонлари ярим асрдан буён хизматда бўлса керак. Аллақачон темирлари занглашга улгурган. Вагон ўриндиқлари ва  алоҳида хона ётоқларидан қўланса ҳид келади. Нархлар эса осмон. Тошкент-Бухоро йўналишидаги Шарқ поездлари аҳволи ҳам ҳавас қиларли даражада эмас. Синган ўриндиқлар, дим вагон, ишламайдиган жалюзилар, эшиги ёпилмайдиган ҳожатхоналар… 

Тузатиш керак бўлган камчиликларнинг  охири йўқ. Ҳатто қатновига ҳали кўп бўлмаган Тошкент-Бухоро, Тошкент-Андижон йўналишидаги Афросиёб тезюрар поездлари ҳам оҳори тўкилишга улгурган. Ўриндиқлар ораси тор, деразалари ишга тушгандан буён ювилмагандек…

Элтузга яқин манбаларнинг маълум қилишича, айни вақтда Ўзбекистон Республикаси Транспорт вазири лавозимида бўлиб турган Очилбой Раматов «Ўзбекистон темир йўллари» давлат компаниясининг бошқарув раиси вақтида ўзи учун маҳсус вагон ясаттирган. Маълумотларга кўра ҳамон  Раматов вилоятларга зарур топшириқлар, давлат раҳбари ташрифлари олдидан ана шу вагонда бориб келаркан. 

Айтишларича, вагондаги шароитлар олдида Маданият вазири Озодбек Назарбековнинг сотмоқчи бўлган 2 миллиард сўмлик уйи ҳижолатда эмиш. 

Бундан билиш мумкинки, йўқдан бор қилиш мумкин. Оддий халқ юрадиган поездларни ҳам жуда Раматов минадиган вагон даражасида бўлмаса ҳам бир нави қилиб таьмирлаб қўйса бўларди. Шунда бечора халқ кўксига ҳам шабада тегарди.

Элтуз Ўзбекистон жамоат транспорти тизимидаги муаммоларни ёритишда давом этади. Каналимизга обуна бўлинг, видеоларимизга лайк қолдиринг.