Ўзбекистон ОТМларида Украинага қарши пропаганда бошландими?

Россиянинг Ўзбекистондаги икки чақага қиммат пропаганда ўчоғи ВГИК бир ўқитувчи қаршисида зир титради.

Ўқитувчи Илья Кожухар урушда қатнашишни истамаган россиялик релокант. У ВГИКда драматургиядан дарс берарди. Талабалар унинг дарсларидан жуда мамнун эди.

Бироқ Москвадаги ВГИК раҳбарияти топшириғи билан Илья Кожухар ишдан ҳайдалди.

Бутун дунёга дағдаға қилаётган «шимол айиғи» амалда бир ўқитувчи қаршисида ожиз қолди.

«Устозимиз зўр эди. Релокант бўлса нима қилибди? У Урушга бормади, қондош, қардош халқ азобларига сабабчи бўлишни истамади. Илья Кожухар сиёсий пропаганда қилмасди, уруш мавзусида гапирмасди. У шунчаки қойилмақом дарс ўтарди» дейди талабалардан бири.

Илья Кожухар кетиб ВГИКдаги драматургия дарслари пропаганда соатига айланди.

«Янги келган ўқитувчи фақат уруш ҳақида гапиради. Украинлар нацист деган сафсата билан дарсни ўтказиб юборади. Биз шу ёлғон-яшиқни эшитиш учун катта пул тўлаяпмизми?» дея таажубланмоқда талабалар.

Россия пропагандистлари нацизм деган ёлғон ортига беркинмоқда. Шу билан бирга Россия қолган вассаллар бўйсунмаса уларни Украина қисмати кутаётганига ҳам зимдан шаъма қиляпти.