Алламжоновга суиқасдда гумонланган шахс Жанубий Кореядан экстрадиция қилинди

Элтуз сал илгари хабар қилганидек,  Комил Алламжоновга қилинган суиқасд ва ҳукумат таркибидаги «тозалашлар» ҳали ҳам давом этмоқда.

Хусусан суиқасдда гумонланган Жавлон Юнусов Жанубий Кореядан Ўзбекистонга экстрадиция қилинди, қидирувда бўлган Қозоғистондаги яна бир шахснинг манзили аниқланди.

Бош прокуратура томонидан Қибрай туманида Ўзбекистон Республикаси Президенти Администрацияси Ахборот сиёсати департаментининг собиқ раҳбари Комил Алламжоновга нисбатан содир этилган қотилликка суиқасд қилиш билан боғлиқ жиноят иши юзасидан тергов ҳаракатлари жадал олиб борилмоқда.

Бош прокуратуранинг маълум қилишича, ушбу жиноятга алоқадор айбланувчилардан бири Жавлон Юнусов Жанубий Корея Республикасида қўлга олиниб, Ўзбекистонга экстрадиция қилинган.

Шунингдек, қидирувда бўлган яна бир айбланувчи К.С. Қозоғистон Республикасида яширинган манзили аниқланиб, унинг билан ҳам тергов жараёнлари давом эттирилган.

Ҳодиса доирасида олиб борилган тергов ишлари жараёнида ҳодиса содир бўлган жой ҳамда айбланувчилар бошқарувида бўлган автомашиналар кўздан кечирилган. Шунингдек, улар истиқомат қилган хонадонларда тинтув ўтказилиб, ишга алоқадор бўлган ашёвий далиллар аниқланиб олинган.

Тезкор қидирув натижасида жиноятга алоқадор бўлган 7 нафар шахс аниқланган бўлиб, улардан 5 нафари қамоққа олинган Яна 2 нафарга нисбатан қидирув эълон қилинган эди.

Бош прокуратура маълумотига кўра, мазкур жиноят иши бўйича тергов ҳаракатлари ҳозирда ҳам давом этмоқда.

Элтуз Ўзбекистон олий ҳокимияти бўғинларидаги ўзгаришларга доир воқеаларни ёритишда давом этади. Каналимизга обуна бўлинг, кўрсатувларимизни кузатиб боринг.