Асосий мавзулар
9 декабр 2019

Шунқорнинг парвозини баландлатаётганлар кимлар?

Мажбурий меҳнат бюросининг Пастдарғом тумани бўлими бошлиғи Илҳом Ҳамдамовнинг 7 декабрь куни ўз вазифасидан озод этилишини мамлакатдаги ҳокимият таназзулининг бир кўриниши ўлароқ баҳолаш мумкин. 

Бундан аввалроқ, 4 декабрь куни Илҳом Ҳамдамов раҳбарлик қилган бўлим ходимлари Пастдарғом тумани ободонлаштириш дирекциясига қарашли бетон заводида электр қуввати ўғирлангани фактларини фош қилган эди.

Айни пайтда расмийлар Илҳом Ҳамдамовнинг ишдан олиниши туманда МИБ фаолияти билан боғлиқ паст кўрсаткичлар оқибати эканини айтмоқда.

Расмийларнинг билдиришича, МИБнинг вилоят бўлимларида олдинроқ республика комиссияси томонидан ўтказилган комплекс текширувда айрим туманларда, жумладан, Пастдарғомда (ўзбек тили қонуниятларини ўзича тушунадиган “Кун.ўз” талқинида Паст Дарғомда) бир қатор кўрсаткичлар бўйича салбий натижалар қайд этилган. 

Шу сабаб билан Илҳом Ҳамдамовдан ташқари МИБнинг Ургут тумани бўлими бошлиғи ҳам ишдан бўшатилган. Текширув якунларига кўра, ҳали яна бир қатор раҳбарлар ва ходимларга нисбатан ҳам интизомий чоралар қўлланиши мумкин.

Аслида МИБдаги оддий раҳбарнинг лавозимидан четлатилиши эътибор қаратилиши лозим бўлган катта воқеа эмас.

Аммо бу иш туман ҳокими Шунқор Худойбердиевнинг ёрдамчиси Асрор Мардиевнинг шахсан ўзи МИБ ходимининг ўз хизмат вазифасини бажаришига тўсқинлик қилгани фонида юз бергани жамиятимиз учун жиддий муаммолардан бирини кўрсатиб бермоқда. 

Яъни бу четлаштириш “Ўйнашмагин арбоб билан, арбоб урар ҳар боб билан” мақолининг амалий рўёби ўлароқ қабул қилинаётир.

Зеро, “Кун.ўз” сайти Шунқор Худойбердиевнинг ноқонуний ҳаракатлари ҳақида бир неча мақолалар эълон қилган, аммо ҳокимга жин ҳам урмаганди. 

Шундан хулоса қилиш мумкинки, “жин” ҳокимнинг таянчларидан бири бўлиши мумкинлигини асло истисно қилиб бўлмайди. 

Бетон заводидаги электрдан ноқонуний фойдаланиш масаласини на МИБ, на электр тармоқлари корхонаси, на ИИВнинг маҳаллий органлари ҳал қила олди. 

Шунинг ўзи ҳам Шунқор Худойбердиевнинг парвозини баландлатаётганлар анча тепада ўтиришидан дарак бермайдими? 

МИБнинг иш фаолияти юзасидан халқ норозилигининг чеки йўқ. Осмондан тушган қарзларни шафқатсиз ундираётган, жабрдийдаларнинг оҳу ноласини пулга чақаётган бу идора ходимларининг кирдикорлари талайгина.

Шу нуқтаи назардан олиб қараганда, МИБ Пастдарғом тумани бўлими бошлиғининг ишдан олиниши мантиқли бўлиши ҳам мумкин.

Аммо туман миқёсидаги раҳбарлар соясида содир этилаётан йирик миқдордаги ўғирлик ортидан унинг ишдан олиниши мантиқ тўқмоғини парчалайди…

Бу воқеа амалдорларнинг қўли узунлиги мантиғини олдинги планга чиқариб, бизнинг жамиятда ҳокимиятга чиққан криминалнинг сўзи сўз, айтгани айтган бўлишини яна бир бор тасдиқлайди.

Eltuz.com

Тағин ўқинг
29 ноябр 2016
Ўзбекистоннинг чегара ҳудудларида аҳолининг кўзи қўшни мамлакатлар худудига ўтган магистрал газ қувурларига тушади. Ўзбекистон газининг аксарияти қўшни давлатлардан ташқари, ...
15 май 2019
Ўзбекистон Республикаси ИИВ Жамоатчилик ва оммавий ахборот воситалари билан алоқалар бошқармаси «Элтуз»да чоп этилган “Тинтув қилинган Маҳмуд Ражабнинг уйидан ...
18 май 2021
Самарқандда «Дамас» автомобили ҳайдовчиси ИИБ ходимининг ўтиш йўлини тўсиб тўхтаган, давлат рақами 828 VSS бўлган машинасига сигнал бергани учун ...
2 май 2016
«Народное слово» газетасининг «Жаҳон» ахборот агентлигига асосланиб ёзишича, БМТнинг Нью-Йоркдаги қароргоҳида БМТ Бош Ассамблеясининг 70-сессиясининг расмий ҳужжати сифатида Ўзбекистонда ...
Блоглар
20 июн 2022
1990 йил 20 июнда Ўзбекистон ССР Олий Совети томонидан Мустақиллик декларацияси қабул қилинган эди. Мамлакат ...
17 июн 2022
Биз нима учун ўзбек жамиятида «аёллар ҳуқуқи» деб гапирамиз ва бу кўпчиликка ёқмайди?Бунинг сабабларини билиш ...
7 июн 2022
(Таниқли шоир ва сиёсатчи Муҳаммад Солиҳнинг “Императив” китобидан 54-қисм. Аудиокитоб матнини муаллифнинг ўзи ўқиган) АМАЛ ...