Deputat Safar Ostonov qonunni nega buzmoqda?

Rost24 nashri deputat Safar Ostonovning qonunga xilof tarzda gazeta bosh muharriri bo‘lib qolayotganiga e'tibor qaratdi.

Maqolada bildirilishicha, Safar Ostonov o‘tgan yilning 22 dekabrida Samarqand viloyatining Kattaqo‘rg‘on 63-saylov okrugidan Oliy Majlisning Qonunchilik palatasiga deputat qilib saylangan edi. 

«O‘zbekiston Respublikasi Oliy Majlisi Qonunchilik palatasi deputatining va Senati a'zosining maqomi to‘g‘risida»gi qonunga ko‘ra, Qonunchilik palatasi deputatlari o‘z vakolatlari davrida ilmiy va pedagogik faoliyatdan tashqari haq to‘lanadigan boshqa turdagi faoliyat bilan shug‘ullanishlari mumkin emas.

Biroq Safar Ostonov hozirgacha ilgarigidek «O‘zbekiston ovozi» va «Golos Uzbekistana» gazetalarida bosh muharriri lavozimida, ya'ni maosh to‘lanadigan ikkinchi joyda ishlashda davom etmoqda.

«Qonun ijodkori bo‘lgan deputat Safar Ostonov O‘zbekiston fuqarosi sifatida O‘zbekiston qonunchiligini hurmat qilishi lozim emasmi?!” deya pisanda qiladi Rost24 nashri.