Catira
21 sentyabr 2017

Eskirgan tayanch tirgaklar mo‘rt bo‘lsa…

Bo‘lmadi. Ko‘pchilik ziyolilarning kutgani bo‘lmadi. O‘zini 26 yildan buyon mustaqil deb biladigan, ko‘ksiga urib bu bilan g‘ururlanadigan davlatning rahbari BMT minbaridan turib yana o‘zga tilda nutq irod qildi.

Arman prezidenti chiqdi, armanchalab chuldiradi. Tojik prezidenti chiqdi, tojikchalab nutqini qoyillatdi.

O‘zbekning yurtboshisi chiqdi, ko‘pchilikning yuragidagi armonni yanada alangalatdi. Tojiklarning peshvoi millati o‘z tilini boshqa tillardan ustun ko‘rdi.

Armanlarning har kuni tanqidga uchrayotgan prezidenti tilga kelganda mard ketdi. Armanilarning ko‘ksini sarbaland qildi.

Islohotchiligi, xalqparvarligi, «xalq bilan muloqoti» uchun madhiyalarga ko‘mib tashlangan o‘zbek prezidenti tilga kelganda qovun tushirdi.

Balki uni maslahatchilari chuv tushirgandir? Balki buning biror siyosiy sabablari bordir? Hoynahoy marhum prezidentning ruhi kimlarnidir cho‘chitgandir?

Nima bo‘lganda ham «maqtalganning qilgan ishini ko‘r», qabilida bo‘ldi bu yog‘i.

BMT Bosh Assambleyasining 72-sessiyasida mamlakatimiz rahbari Shavkat Mirziyoev o‘zbek tilida ma'ruza qilishi kutilyapti, deb yozgan «kun.o‘z» tilini tishlab qoldi.

Prezidentimiz olamshumul muammolar haqida so‘z yuritdi, deya o‘zining bashorati amalga oshmaganini yopishga urindi.

Nima desin? E-e, qovun tushirdi-ku, desinmi? Unday desa ertaga ishlay oladimi? Bu sayt-ku, hech bo‘lmaganda «o‘zbekcha gapiradi», deya shunga undashga uringandi.

Mahalliy «boshqalar» esa Yulduz Usmonovaning avvalgi podshohi zamonida bo‘lganidek shunga ishora qilishga ham jur'at etmadi.

O‘zbekning yana bir umidi o‘ldi. O‘lganda ham g‘ururni chilparchin qilib o‘ldi. O‘lganning ortidan gapirmaydi, deydilar. Lekin bu gaplar o‘lgan umid haqida bo‘lmasa kerak…

Ayrimlar bu holatni sharmandalikka yo‘ydi. Aslida sharmandligimiz faqat shumikin? BMT minbaridan turib, majburiy mehnatni yo‘q qildik, dedik. To‘liq erkin konvertatsiyaga o‘tdik, dedik.

Yoshlar huquqlari to‘g‘risida xalqaro konventsiya qabul qilishni taklif etdik. Yoshlarimiz, talabalarimiz shu kunlarda ommaviy ravishda paxtaga jo‘natilgan bir paytda bunday ko‘zbo‘yamachilik qilishimiz sharmandalik emasmi?

O‘zbekiston prezidenti BMT minbaridan turib mamlakat hukumatining asosiy faoliyati bugungi kunda «mamlakatning yangi qiyofasini shakllantirishga» qaratilganini aytdi.

Mamlakatimizning «yangi qiyofasi» davlat tiliga, yumshoqroq aytganda, bepisandlik, yolg‘onni haqiqat sifatida gapirish asosida shakllanadigan bo‘lsa, bunday «yangi qiyofa»ning mohiyatida, botinida eski tuzumning tayanch tirgaklari saqlanib qolsa, xalqning amalga oshayotgan o‘zgarishlar samarasiga bo‘lgan ishonchiga putur yetadi!

Bahodir Sharif
O‘zbekistonlik gazetxon tahallusi
Eltuz.com

Tag‘in o‘qing
8 iyun 2016
O‘zbekistonda maktab o‘quvchilarini masjidga kiritmaslik harakatlari davom etarkan, ramazon oylarida masjidlarda o‘qituvchilar navbatchilik iladigan bo‘ldi. «Yuqoridan shunday topshiriq berishdi», ...
22 iyul 2017
E'tiroz bildirishga urinib ham ko‘rmang, chunki bu bugunning haqiqati. O‘zbekistonning qaysi viloyatiga bormang, paxtazorda yurgan, ko‘cha supurayotgan, tezak, qog‘oz, ...
1 noyabr 2016
2002 yilda kanadalik o‘spirin Kristofer Xervig (Christopher Herwig) sobiq sovet respublikalaridan o‘tadigan velosiped poygasida qatnashganida ilk bora sovet rassomi ...
25 fevral 2019
Joriy yilning 8 fevralida ishdan olinib, ustidan jinoyat ishi ochilgan DXX sobiq raisi Ixtiyor Abdullaevning qarindoshlari va hamtovoqlari nazoratga ...
Bloglar
3 yanvar 2023
Ulug‘ o‘zbek shoiri va muholifat lideri Muhammad Solih bilan suhbatning 20-qismida jurnalistning «Adabiyot nima?» degan ...
25 dekabr 2022
Ulug‘ o‘zbek shoiri va muholifat lideri Muhammad Solih bilan suhbatning 18-qismidan 90-yillarda taniqli adabiyotshunos Ibrohim ...
20 dekabr 2022
Ulug‘ o‘zbek shoiri va muholifat lideri Muhammad Solih suhbatning 17-qismi muxolifat va hokimiyatning kelajagi haqida ...