Asosiy mavzular
12 dekabr 2017

Qashshoqlar farovonligi yoki kaltak shukronasi

“Ijtimoiy fikr” baraka topsin, yana rahbarga yoqadigan, aqlini taniganlarning istehzosiga sabab bo‘ladigan navbatdagi so‘rovi natijasini e'lon qildi.

Unga ishonadigan bo‘lsak, so‘rov ishtirokchilarining 90,2 foizi prezidentning siyosati aholining orzu-umidlarini to‘la ro‘yobga chiqarayotganini bildirgan.

Davlat rahbari sa'y-harakatlari natijasida iqtisodiyot, ijtimoiy soha, tibbiyot, ilm-fan va ta'lim, axborot-kommunikatsiya texnologiyalari, sanoat, sud-huquq tizimi, fermerlik va tadbirkorlikni modernizatsiya qilish, investitsiyalar jalb qilish bo‘yicha erishilgan natijalar yurtdoshlarimiz ishonchini mustahkamlayotgani aytilgan.

Olingan natijalarga ko‘ra, yurtdoshlarimizning aksariyati Sh.Mirziyoev O‘zbekiston fuqarolari orzu-umidlarini to‘la ro‘yobga chiqarayotganiga va aholining mutlaq qo‘llab-quvvatlashiga ega rahbar ekaniga qat'iy ishonadi.

Monitoring prezidentga ishonch darajasi 2017 yil iyul oyidagi 92,4 foizdan joriy yilning oktyabr oyida 93,1 foizga oshganini ko‘rsatgan.

Bu raqamlarni marhum prezident Islom Karimov davrida xuddi shu mavzuda “Ijtimoiy fikr” tomonidan o‘tkazilgan so‘rov natijalari bilan solishtiramiz.

Sal farq bor. Raqamlar nisbatan kichik, ammo zalvori yerni yoradi. Xuddi Sh.Mirziyoevning bugungi ijtimoiy, iqtisodiy ahvolimiz holatini tanqid qilganiga hamohang.

Agar tanqid qilmaganida, nazarimizda, Karimov davridagi ko‘rsatkichlardan ortiq bo‘lardi, aslo kam emas.

Shunchalik hamohangki, Karimov davridagi raqamlarni takrorlay olmaslik darajasida. Kamtarlikning o‘zbek yurtboshilari darajasidagi ko‘rsatkichi.

Holbuki, O‘zbekistonda aholining 6,3 foizi yoki 1,9 million kishi to‘yib ovqatlanmaydi. Bu BMT Oziq-ovqat va qishloq xo‘jaligi tashkilotining 2016 yil yakunlari bo‘yicha e'lon qilgan hisobotida keltirilgan raqamlar.

O‘tgan bir yilda bundan yaxshiroq bo‘lib qolganini isbotlovchi dalillar yo‘q. Rasmiy statistika idorasining narxlar oshgani haqidagi ma'lumotlariga, aholining real daromadlari ko‘paygani haqidagi ma'lumotlar yo‘qligiga asoslansak, ahvol yaxshilanmagani haqiqatga yaqinroq.

Buyuk Britaniyaning The Legatum Institute tahliliy markazi e'lon qilgan “Farovonlik 2017” indeksida esa O‘zbekiston umuman yo‘q.

Shunday “farovon”, prezidenti o‘z fuqarolari “orzu-umidlarini to‘la ro‘yobga chiqarayotgan” mamlakatning bu indeksga kirmay qolganining o‘zi g‘alati.

Rasmiy OAV “o‘zbek xalqining farovonligi, turmush darajasi yuksalib borayotgani”ni og‘iz ko‘pirtirib aytayotgan, qolaversa, aholisining “orzu-umidlari to‘la ro‘yobga chiqarilayotgan” mamlakat qolib, bu reyting boshida qandaydir Norvegiya, Yangi Zelandiya va Finlyandiya kabi mamlakatlar o‘ralashib yurgani g‘alatidek tuyuladi.

Eng qizig‘i, “Ijtimoiy fikr” “farovonlikda yashayotgan” bu xalqning o‘zidan haqiqatan ham shunday umrguzaronlik qilayotgani haqida so‘rab ko‘rganmikin?!

Eltuz

Tag‘in o‘qing
24 may 2019
Rasmiy taqdimoti o‘tkazilmagan bu klipda Sherali Jo‘raev sovet yuqori nomenklaturasining sevimli ulovi bo‘lgan “Chayka” avtomobilini yolg‘iz boshqargani aks ettiriladi. ...
18 sentyabr 2017
Uylandingmi tamom, bir yildan keyin farzand ko‘rmasang “bir balosi bor bularning” kabi tavqi la'natni quchoqlaysan. Mana dopustim, tasavvur qiling ...
28 aprel 2016
Bugun O‘zbekistonning markaziy shaharlarida kambag‘allarning munkaygan kulbasi yonida qad ko‘targan muhtasham qasrlarni ko‘rish mumkin. Albatta, aksariyat amaldorlar kambag‘al mahallada ...
18 dekabr 2020
Bundan roppa-rosa 100 yil oldin bolsheviklar qo‘mondoni Mixail Frunze avval Buxoroni, keyin uning shotirlari Xivani to‘plardan o‘qqa tutib, ikki ...
Bloglar
10 may 2021
«Eltuz» kanalida o‘zining “Nyu-Yorkdan nazar” videoblogini yuritayotgan 70 yoshli qishloq xo‘jaligi mutaxassisi Ismoil Ospanov klasterlar ...
6 may 2021
1881 yilning 6 mayida Mixail Skobelev boshchiligidagi rus kolonizatorlari Xiva xonligiga qarashli Axaltaka viloyatini okkupatsiya ...
29 aprel 2021
Feminizm deya og‘izlaringning ikki chetida tupuk yaltirab tirjayasizlar, o‘zlaringcha iyaklaringni ko‘tarib kinoya qilasizlar, go‘yo bizning ...