Millatni sevishni yahudiylardan o‘rganaylik

Demokratiya hokim bo‘lgan davlatlarda irqchilik va antisemitizm (yahudiylarni yomon ko‘rish) qattiq qoralanadi. Qora tanlini «negr», lotinamerikalikni «latinos», yahudiyni «la'nati yahud» degan odam qamalishi mumkin.

Lekin aksar musulmonlarda, shu qatorda o‘zbeklarda ham antisemitizm o‘ta kuchli. Yoshligimizdan buvilarimiz juhutlarning qabri yo‘q, ular o‘liklarini qaynatib yeyishadi, deb cho‘pchaklarni qulog‘imizga quyib tashlashadi. Garchi islomda millatchilik qoralansa-da, masjidlarda yahudiylar la'natlanib duo qilinadi. Toshkentda ishlaydigan bir yurist ham yahudiylarni so‘kib yozayotganiga guvoh bo‘ldim.

Yahudiylar azaldan inoq xalq, savdo-sotiqni yaxshi bilgani uchun doimo boy bo‘lishgan.

Yahudiylarni yomon ko‘rishga, asosan, Falastindagi urushlar turtki bo‘lgan. Yahudiyni la'natlaydigan o‘zbek falastinliklarning tarafini olib duo qiladi. Lekin ko‘pchilik bilmaydiki, yahudiylar bugungi Isroilda azaldan yashab kelishgan. Isroil qurilishidan avval o‘sha falastinliklarning o‘zlari Usmonli xalifaligiga qarshi kurashgan. Xalifalik yo‘q bo‘lgandan keyin esa o‘sha yerlarga ko‘chib kelgan yahudiylarga o‘z uylarini sotishgan yaxshigina pulga. Millionlab falastinlik o‘z uyini sotgan.

Nasroniylikda ham yahudiylar sevilmagan, la'natlangan millat sifatida ko‘rilgan. Nasroniy Gitler ham shu sababdan yahudiylarni qirib tashlagan.

Bugungi kunda yahudiylar musulmonlarga dushman emas. Ularning falastinliklar va arablar bilan dushmanchiligi diniy emas, balki milliy dushmanchilikdir.

Yahudiylar Turkiston muxtoriyati qurilishida ham jonbozlik ko‘rsatishgan. Ko‘pgina pul ehson qilishgan.

Biz o‘zbeklarda yahudiylarni yomon ko‘rishga asos yo‘q, ular Markaziy Osiyoda ko‘p yillar yashagan, o‘zbek madaniyatiga hissa qo‘shishgan. O‘zbek shashmaqomini dunyoga yoyib yurganlar ham Buxoro yahudiylaridir.

Yer sayyorasi bitta, istaymizmi-yo‘qmi, biz boshqalar, xususan, yahudiylar bilan ham do‘st bo‘lib yashashimiz kerak, ulardan rivojlanish, texnologiya, inoqlik, bir-birini qo‘llash va, eng muhimi, millatni sevish borasida o‘rnak olsak arziydi.

Maqola muallifi Bahrom Rahmon 25 yoshda. Qirg‘izistonning O‘sh shahrida tug‘ilgan. Diniy va etnik mavzulardagi dolzarb maqolalar muallifi.

Eltuz.com