Farg‘onadagi Yangiqo‘rg‘on bozori yonib kul bo‘ldi

4 aprelga o‘tar kechasi tunda Farg‘ona viloyatining Buvayda tumaniga qarashli Yangiqo‘rg‘on shaharchasidagi Markaziy dehqon bozorida yong‘in chiqdi.

Voqea guvohlarining aytishicha, yong‘in tunda sodir bo‘lganligi uchun qurbonlar yo‘q.

Buvayda tumani IIB yong‘in xavfsizligi bo‘yicha mas'ulining aytishicha, yong‘in elektr energiyasidagi qisqa tutashuv sababli kelib chiqqan.

Biroq yong‘in atay uyushtirilgan bo‘lishi mumkinligi ehtimoli ham aytilmoqda.

2017 yilning 27 martida prezidentning 2017-2019 yillar davrida dehqon bozorlarini rekonstruktsiya qilish va ularning hududida zamonaviy savdo majmualari qurish dasturini tasdiqlash to‘g‘risidagi qarori chiqqan edi.

Eltuz muxbirining ayrim suhbatdoshlari bozorni ayni qurilish dasturiga kiritish rejasi ortidan shu ish ataydan qilinganligi haqidagi farazni aytishmoqda.

Yong‘indan ko‘rilgan zararning aniq miqdori hozircha noma'lum, biroq, shu soatgacha, 38 nafar tadbirkorning xonavayron bo‘lgani, ya'ni ularning patentlari bekor qilingani rasman bildirilgan.

«Bozorda hech narsa qolmagan, tuni bilan yongan» deydi voqea joyini borib ko‘rgan ayol Eltuzning mobil muxbiriga.

Eltuz.com