Andijonlik shifokorlardan «ixtiyoriy paxtaga chiqish» talab qilindi

Andijon viloyati shoshilinch tez tibbiy yordam xizmati shifokori A.ning «Eltuz»ga bildirishicha, bundan 5-6 kun oldin viloyat hokimligi vakili (A. uning familiyasini aytib bera olmadi) shifokorlarga yig‘ilish davomida “hammang o‘z ixtiyoring bilan tilxat yozib paxtaga chiqasan. Butun kasalxona 3 guruhga bo‘linib, 15 kundan paxtaga boradi. Bormaganlar o‘z arizasiga ko‘ra ishdan ketadi”, degan.

Shifokor A.ning tag‘in bildirishicha u hokimlik vakiliga, “O‘lsam ham bormayman, hozir ingliz tili o‘rganyapman, haydasa haydavorsin, ketishdan oldin oq xalatimni hokimning betiga otib, Dubayga ketaman ishlagani. Hamma xujjatlarim tayyor”, deb aytgan.

Lekin barcha tibbiyot xodimlari ham «yuqori»ning buyrug‘iga qarshi chiqishayotgani yo‘q.

Xususan, o‘tgan hafta o‘simliklar karantini davlat inspektsiyasi Marhamat tumani bo‘limida ishlovchi xodimlar Ulug‘nor tumaniga paxtaga yuborilgan edi.

Ulardan ayrimlari majburan yuborilganligi xaqida shikoyat qilganidan so‘ng ortga qaytarilgan.

Ammo negadir hech qancha o‘tmay yana paxtaga jo‘nab ketishgan.

«Rahbariyat ulardan “ixtiyoriy” niqobi ostida rozilik xati yozdirib olibdi», deydi «Eltuz» muxbiriga andijonlik shifokor.

Eltuz.com