Asosiy mavzular
4 fevral 2019

Bosh vazirdan ulgi olgan hokim

Tadbirkorlikni himoya qilish shiorini ko‘tarib olgan amaldorlar aslida ishbilarmonlarning sa'y-harakatlariga eng katta to‘siq bo‘lib qolayotir.

Xorazmda o‘zi xon, ko‘lankasi maydon hokimdan jabr chekkan navbatdagi biznesmen turizmni rivojlantirish borasidagi balandparvoz siyosatga ishongan tadbirkor bo‘ldi.

“Xorazm beklari” MChJ tomonidan Urganch shahrida barcha rasmiyatchiliklari ado etilgan, ya'ni tegishli hujjatlar asosida qurilayotgan mehmonxona shaharning yangi hokimi buyrug‘i bilan buzib tashlandi.

Kun.uz saytining yozishicha, tadbirkor bu loyiha uchun bankdan 6,5 milliard so‘m kredit olgan. Imorat buzilgunga qadar kredit mablag‘laridan 4 milliard so‘mga yaqinini, o‘z mablag‘idan 1 milliard so‘mdan ortig‘ini sarflagan.

Shuncha mehnat, mablag‘, qanchadan qancha asablar sarflangan ish hokimning bir og‘iz topshirig‘i bilan yo‘qqa chiqdi.

Shahar hokimi Shuhrat Abdullaev “loyiha viloyat hokimi tasdig‘idan o‘tmagani, eski hokim yerni berib yuborgani”ni bahona qilib, buzg‘unchilikka bosh bo‘ldi.

Eng afsuslanarlisi, sudsiz, so‘rovsiz, tegishli hujjatlarsiz, bor-yo‘g‘i bir amaldorlarning og‘zaki buyrug‘i bilan qilinayotgan bunday ishlar O‘zbekiston uchun begona emas.

O‘tgan yil noyabrda Toshkentda “Unique arh project” shirkati tomonidan qurilgan turar joy binosi bosh vazirning xuddi shunday og‘zaki topshirig‘i bilan buzib tashlangan edi.

Shu kunlarda Yangibozor turbazasini Milliy gvardiya manfaati yo‘lida tortib olish harakatlari davom etmoqda. Holbuki, bu tuzilma uchun yangi, zamonaviy ob'ektni shu atrofdan qurish uchun barcha sharoitlar bor.

Urganchning hokimi ham buzg‘unchilik borasida kimdan ulgi olganini ko‘ryapsizmi? Hammasi tepadagilardan namuna olib qilinyapti.

Eng yomoni, shov-shuv ko‘tarilib, noqonuniy ish qilgani oydinlashgan hokimlar tadbirkorlarga yetkazilgan zararni davlat hisobidan qoplash (agar qoplansa) va'dasini berishmoqda.

Urganchdagi bitay deb qolgan mehmonxonani buzgan hokim ham “tadbirkorning yeri, bankdan olgan krediti va zararini qoplash masalalari ko‘rib chiqiladi”, deganda tadbirkorning zararini davlat hisobidan, ya'ni sizu bizning cho‘ntagimizdan to‘lashga ishora qilayotgani ko‘rinib turibdi.

Shu o‘rinda savol tug‘iladi? Bitta amaldorning gap-so‘zi bilan noqonuniy buzilayotgan bunday binolar tovonini nega o‘sha mansabdor emas, balki davlat to‘lashi kerak?

Axir qonun buzildimi, unga javob berish ham o‘sha qonunbuzar zimmasida bo‘lishi kerak emasmi?

Nega ularning ahmoqliklari uchun davlat byudjeti zarar ko‘rishi kerak?

Shuning uchun tadbirkorlik himoyasi haqida balandparvoz va'dalar qilayotgan hukumatga bitta taklif.

Qonuniy qurilishni noqonuniy ravishda buzayotganlarning bir-ikkitasi yetkazilgan zararni o‘z hisobidan qoplashiga erishish zarur. Ya'ni noqonuniy xatti-harakat uchun qonunan jazo qo‘llansin.

O‘shanda hukumatning siyosatiga ishonch ortishi bilan birga, o‘zini qonundan ustun ko‘radigan amaldorlarning esi kirarmidi!

Bahodir Sharif
Eltuz.com

Tag‘in o‘qing
29 mart 2017
Mirziyoevning kuyovi Otabek Shaxanov, O‘zbekiston prezidentining Qozog‘istonga rasmiy safari chog‘ida o‘zbek delegatsiyasi tarkibida ko‘rindi. 22-mart kuni tasvirga olingan prezident ...
14 yanvar 2016
O‘zbekistonda deyarli 100 foiz tadbirkor banklarga ishonishiga ishonasizmi? “Milliy tiklanish” gazetasining yozishicha, “Ijtimoiy fikr” jamoatchilik markazi o‘tkazgan so‘rovda qatnashgan ...
16 noyabr 2015
Bugun, 2015 yil 16 noyabr kuni taxminan ertalab soat 8.30 huquq himoyachisi O‘ktam Pardaevning Jizzax shahridagi uyiga militsiya xodimlari ...
20 sentyabr 2017
Prezident Mirziyoev BMT Bosh Assambleyasining 72 sessiyasida qatnashish uchun AQShga rossiyalik milliarder Alisher Usmonovning Airbus A340-313 shaxsiy samolyotida bordi. ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...