Asosiy mavzular
19 noyabr 2019

Tadbirkorlar: «Toshkent savdo markazida 700 dan ziyod do‘kon buziladi»

«Toshkent savdo markazi»ga  (sobiq «Abu Saxiy» MChJ) qarashli bozordagi do‘konlari buzilishidan norozi bo‘lgan 700 dan ortiq fuqaro 16 noyabr kuni bozor ma'muriyati oldiga yig‘ildi. Tadbirkorlarning noroziligiga bozor ma'muriyatining bir kun oldin do‘konlarini 1 dekabrgacha bo‘shatib qo‘yishlari haqida ogohlantirish bergani sabab bo‘ldi.

Shu kungi norozilik chiqishidan so‘ng kechqurun Chilonzor tumani hokimi va bozor mutasaddilari do‘kondorlarning ayrimlari bilan uchrashib yig‘ilish o‘tkazishdi.  «Eltuz»ga kelib tushgan videoda Chilonzor tumani hokimligi vakili va Alisher ismli yana bir mulozimning do‘kondorlar bilan 16 noyabrdagi ayni uchrashuvi aks etgan.

Videoda, jumladan, hokimlik mulozimi Alisher (familiyasi noma'lum) hech kimning do‘koni buzib tashlanmasligi, har kim bilan alohida kelishuv qilinishi haqida gapiradi.

«Masalan, do‘koningiz shumi? Sizga o‘rniga mana shuni beramiz. 6 oyda qurib oladigan bo‘lsangiz, bu yerda ishlab turasiz. Rozi bo‘lgan joyingizni beramiz deb kelishuv qilamiz», deydi hokimlik mulozimi.  

Ismini aytmagan, «Eltuz» suhbatlashgan do‘kon egalaridan bo‘lgan bir ayolning aytishicha, uni bozor ma'muriyati xodimi do‘konini bo‘shatib qo‘yishi haqida 15 noyabr kuni og‘zaki ogohlantirgan. Buning sababini do‘kon infratuzilmasini o‘zgartirish maqsadida buzilishi bilan izohlagan.

«Mening do‘konim 16 kvadrat metr maydonda joylashgan. Do‘konning mulk kadastr hujjatlari 2012 yilning aprelida nomimga rasmiylashtirilgan. Do‘konning bugungi kundagi narxi 100 ming dollarga yaqin bo‘ladi. Lekin gap tovon puli haqida yoki bozor o‘rnida quriladigan yangi do‘konlarning bizga berilishi haqida ketmayapti», – deydi savdogar ayol.

Uning «Eltuz»ga bildirishicha, buziladigan do‘konlarga yondosh maydonda yangi do‘konlar qurilgan. Ijara haqi qimmat bo‘lgani uchun ular bo‘sh yotibdi. Hokimlikning mayda do‘kondorlarni ko‘chaga haydashdan maqsadi shu do‘konlarni ijaraga berish bo‘lishi mumkin.

«Do‘konlarning buzilishiga bahona qilib, yong‘inga qarshi chora sifatida elektr kabellarini almashtirishni ro‘kach qilishyapti. Lekin har bir do‘kon egasi bu xizmat uchun ma'muriyatga oyma-oy pul to‘laydi. Masalan, men bir million 40 ming so‘m kommunal haqi to‘layman», deydi «Eltuz» suhbatdoshlaridan yana biri.

Videoda ko‘rinishicha, do‘kondorlarning noroziligidan so‘ng amaldorlar ozroq shashtidan tushishgan. Ular 15 noyabrdagi do‘konlarni buzish haqidagi gap bekor bo‘lgani, do‘konlarni buzmasdan turib infratuzilmani o‘zgartirish haqida maslahatlashib ko‘rishni va'da qilishmoqda.

Shuningdek, hokimlikning do‘konlarni buzish harakatiga O‘zbekiston hukumatining 16 noyabrda chiqargan Yer uchastkalarining olib qo‘yilishi va olib qo‘yilayotgan ko‘chmas mulk ob'ektlari mulkdorlariga kompensatsiya berish tartibi to‘g‘risidagi nizomni tasdiqlash qarori sabab bo‘lgan bo‘lishi ham mumkin.

Ushbu hukumat qarorida ko‘zda tutilgan yangi tartib, Adliya vazirligiga ko‘ra, 2020 yilning 1 yanvaridan kuchga kiradi. «Abu Saxiy» do‘kondorlaridan esa do‘konlarini 1 dekabrga qadar bo‘shatish talab qilinmoqda.

«Aftidan, hokimlikdagilar ancha ilgaridan do‘konlarimizga ko‘z tikishgan. Yangi qaror chiqishidan xabardor bo‘lishgach esa buni dekabrgacha tezroq uddalashga urinishmoqda. Chunki prezidentning yangi qarori kuchga kirsa, ular chorasiz qolishlari mumkin», deydi «Eltuz» bilan suhbatda tijoratchi ayol.

Eltuz.com

Tag‘in o‘qing
1 iyun 2016
O‘zbekiston inson huquqlari jamiyatining Sirdaryo viloyati bo‘limi raisi bo‘lgan, Jasliq lagerida 10 yildan beri jazo muddatini o‘tayotgan A'zam Farmonovning ...
5 oktyabr 2023
Eltuz portaliga kelgan navbatdagi beshta shikoyat maktubini o‘qiymiz. Ular O‘zbeistonning Jizzax, Andijon, Toshkent, Qashqadaryo va Surxondaryo viloyatlaridan kelgan. Dastlabki ...
31 mart 2016
Qozog‘istondagi parlament saylovi dastlabki natijalariga ko‘ra, Prezident Nursulton Nazarboev yetakchiligidagi «Nur Otan» partiyasi 82,15 foiz ovoz to‘plab g‘alabaga erishgan. ...
25 fevral 2022
O‘zbek internetini kuzatsam, ekstremal g‘oyalarni, jinoyat va urushni qo‘llab-quvvatlovchilar juda ko‘pligiga e'tibor beraman. Faqat putinparastlarni nazarda tutmayapman, turli qarash ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...