«Temur eli qul, Yorab…»

Yusuf Juma 1958 yilda Buxoro viloyatining Qorako‘l tumanida tavallud topgan. Buxoro pedagogika institutini tamomlagan. Birinchi she'riy to‘plami «Haqiqatning oltin olmasi» 1984 yilda chop etilgan. «Birlik» xalq harakati faollaridan bo‘lgan. 2001 yilda «aksilhukumat mazmunidagi» deb ko‘rilgan she'rlari uchun davlat tuzumiga tajovuz qilishda ayblanib, uch yil shartli jazoga mahkum etilgan.

Eltuz – «Ozodlik ohanglari» audio to‘plamiga kirgan she'rlarni taqdim etishda davom etadi. 2007 yili Soros jamg‘armasi tomonidan Londonda chop etilgan bu kitobga o‘z yurtida aksar taqiqlangan turfa shoirlarning ijtimoiy she'rlari o‘rin olgan.

Elning asl erlari Andijonda otildi,
Dukchi eshon pirlari Andijonda otildi.
Namanganda otildi, otildi Farg‘onada,
Eng oxirgi sherlari Andijonda otildi.

Omondir so‘qirlari, omondir qashqirlari,
Sharifjon Shokirlari Andijonda otildi.
O‘ldirildi bo‘lajak Boborahim Mashrablar,
Yo‘lbarsdek Boburlari Andijonda otildi.

Dilda zolim tirlari, haq yo‘lin sobirlari,
Nurga to‘lsin go‘rlari, Andijonda otildi.
Iymonga sodiq ketdi, ko‘zlari ochik, ketdi,
Ersiz qoldi yerlari, Andijonda otildi.

Yusufning yuragida erlarga otilgan o‘q,
Elning asl erlari Andijonda otildi.

Yusuf Juma
«Ozodlik ohanglari» Eltuz.com