Qor ostidan oson pul topayotgan «dangasalar» videosi tarqaldi

12 fevral kuni tarmoqda Sankt-Peterburgda qor kurayotgan o‘zbeklar videosi tarqaldi.

«Pul topish juda oson. Qorlarning tagidan pul chiqadi. Necha kundan beri yig‘ib yotibmiz. Yozda bo‘lsa barg tozalaymiz, barglarning tagidan pul chiqadi», deydi piterlik gasterbayter va qorkurak bilan qalinligi tizzadan baland qorlar orasidan 200 rubl va 100 dollar «pul topib» ko‘rsatadi.

Izohlardan ma'lum bo‘lishicha, bu video Rossiyaga O‘zbekistondan faqatgina dangasalar, ishyoqmaslar ketadi, degan gaplarga o‘zbek gastarbayterining navbatdagi o‘ziga xos achchiq hazil aralash javobidir.

«Bu Moskvaga kelganlar pul qazib oladi, deganlarga… Sizlar ham kelinglar, 17, 22 qavatli uylarga chiqib qor kurab ko‘ringizlar… Qiyinchiligini ko‘rasiz… Keyin ahvollaringizni tomosha qilish kerak… Musofirning noni mana shunaqa qiyinchilik bilan keladi…», deya yozadi bu fikrni davom ettirib Azizbek Jo‘raev.

O‘zbekistonning 2016 yili o‘lgan prezidenti Islom Karimov ish topish ilinjida xorijga chiqib ketganlarni «dangasa» deb atab, ulardan ijirg‘anishini bildirgan edi.

Karimov o‘lganidan keyin ham uning o‘zbek gasterbayterlari haqidagi gaplari atrofidagi munozara to‘xtamadi.

Yana bir feysbuk yuzeri Sanamoy Alibekova esa yosh yigit-qizlarning mamlakatni tark etayotganini O‘zbekistonda munosib ish yo‘qligi bilan bog‘laydi.

«Ayrim qo‘shtirnoq ichidagi rahbarlar faqat o‘zini o‘ylaydi. O‘zimizda ish yo‘q. Bor bo‘lsa ham xizmatchilar o‘z ishlarini emas, hokimiyat buyurgan ishlarni qilib yurishadi. Ekin-tikin, «uyingizni, dumingizning tagini tozalang!» deb ko‘chadagi ishlarni qilib, ishxonadan kech qaytishadi. O‘ylashmaydiki, ularning uyi, bola-chaqasi bor. Ishimdan ajralib qolmay deb majbur ishlashyapti», deydi Alibekova.

Eltuz.com