«O‘n daqiqa o‘ttiz sakkiz soniya…»

Turkiya poytaxti Anqarada 2019 yili halok bo‘lgan o‘zbekistonlik 23 yashar Nodira Qodirovaning ishi Konstitutsiyaviy sudda ko‘rib chiqilmoqda. Bu haqda turkiyalik advokat Ilyos Do‘g‘on matbuotga ma'lum qildi. Advokat mazkur ishni ko‘rib chiqish iltimosi bilan sudga ariza kiritgan edi.

Advokat arizasida Nodira Qodirovaning ishi yetarli tergov qilinmaganini, tergov tamoyillari buzilganini bildirgan. Ilyos Do‘g‘on mahalliy prokuratura Nodira Qodirova o‘z joniga qasd qilgan, degan xulosaga kelganini, ammo qiz yashagan xonadagi qator buyumlar bu xulosani shubha ostiga qo‘yishini ham ta'kidlagan.

Nodira Qodirova 2019 yilning 24 sentyabr kuni tonggi 8:48 da general O‘nalga tegishli to‘pponchadan otilgan o‘qdan yaralangan. Soat 9:50 da Bilkent kasalxonasida joni uzilgan.

U parlament deputati bo‘lgan general Shirin O‘nalning uyida 2017 yildan beri ishlab kelgan va generalning kasalmand onasiga oqsochlik qilgan. Nodira Qodirovaning sirli o‘limi Turkiya ommaviy axborot vositalarida katta shov-shuvga sabab bo‘lgan edi.

«Eltuz» nashri ham bu voqea bo‘yicha qator maqolalar e'lon qilgan edi. Shunday maqolalardan birini AQShda yashovchi faol Bahodir Fayz yozgandi.

Eltuz.com