Mingchinorlik qizni guruh bo‘lib zo‘rlaganlar qamoqqa olindi

Surxondaryo viloyatining Oltinsoy tumanida 7 yigit 15 sentyabr kuni 20 yashar qizni guruh bo‘lib zo‘rlaganlikda ayblanib qamoqqa olindi.

Bu haqda “Eltuz” muxbiriga tergovga yaqin manba ma'lum qildi.

Unga ko‘ra, tumanning Mingchinor MFYda yashovchi 20 yoshli qiz to‘ydan uyiga qaytayotganda 7 nafar yigit tomonidan bog‘da zo‘rlangan.

Tergovga yaqin mulozimning “Eltuz”ga bildirishicha, qiz 15 sentyabr kuni to‘ydan uyiga qaytayotgan bo‘lgan. Uni yigitlar sudrab, qo‘lidan majburlab tortib boqqa olib kelgan.

Zo‘rlaganlar soni 7 nafardan ko‘p ekani haqida ijtimoiy tarmoqda tarqalgan gaplar o‘z tasdig‘ini topmadi.

Bog‘dagi zo‘rlash

Voqea 15 sentyabr kuni 23:00 larda sodir bo‘lgan. Tergov hujjatlarini ko‘rgan manbaning “Eltuz”ga aytishicha, o‘sha kuni Mingchinor MFYda yashaydigan 20 yashar qiz to‘yga borgan. To‘y hovlida karantin sharoitida bo‘lib o‘tgani bois oz odam qatnashgan. 

Bog‘ to‘y bo‘lib o‘tgan hovlidan uzoq bo‘lmagan hududda joylashgan. To‘y tugagach, qiz uyiga yo‘l olgan. Yo‘lda qizga bir guruh yigitlar tashlanib, boqqa sudrab borishgan. U yerda qizni birin-ketin zo‘rlashgan. (Ayblanuvchi yigitlarning yoshi  23 va 18 yoshda bo‘lgan).

Qiz qarshilik ko‘rsatmasligi uchun qo‘l va oyoqlari yigitlar tomonidan almashinib ushlab turilgan. Ushbu jarayon bir yarim soatcha davom etib, qiz boqqa tashlab ketilgan.

“Eltuz” muxbiri qiz guruh bo‘lib zo‘rlangan MFY faollari va huquq-tartibot organi xodimlari bilan ham gaplashdi.

Ularning so‘zlariga ko‘ra, mazkur holat yuzasidan Jinoyat kodeksining 118-moddasi (nomusga tegish) 2-qismi bilan jinoyat ishi qo‘zg‘atilgan. Qizni zo‘rlashda gumonlangan 7 yigit shu kunda qamoqda qolmoqda.

“Eltuz”qizning o‘zi va yaqinlari bilan bog‘lana olmadi. Ayblanuvchilar va ularning yaqinlari bilan ham bog‘lanish imkoni bo‘lmadi.

Xuddi shunga o‘xshash jinoyat 2019 yilda Qashqadaryo viloyati Qarshi shahrida ham sodir bo‘lgan edi. Shuningdek, 2018 yilda Marg‘ilon va Qo‘qon mehribonlik uylari tarbiyalanuvchilari ham zo‘rlangani haqida o‘zbek elektron nashrlari xabar tarqatgandi.

Eltuz.com